Liverpool tana Salah aiawh thei tur player 5

Admin - Oct 18, 2021

Liverpool tana Salah aiawh thei tur player 5

Liverpool club tana Mohamed Salah tangkai leh pawimawh zia chu inhrilh nawn ngai lovin kan hre theuh awm e. Mahse, Salah hian a khelh danah tun hma a phak ta lo deuh a, Liverpool ropui vanglai a tlak hiam rualin Salah hi a chuai ve ta mai nge, Salah an tun hma a phak tawh loh vang zawkin Liverpool ropuina hi tla hniam ta zawk? tih pawh hi in zawh tham a tling awm e. 

Mohamed Salah hian Anfield hi chhuahsan ta thut se, a aiawh a khel thei tur Liverpool hotute leh fans ten an beisei player 5 te i han thlir dawn teh ang. 

#5 Kylian Mbappe
    Thuruk lang tlang ruak si thil pakhat chu Kylian Mbappe hian Paris Saint-Germain chhuahsan a duh ru reng a ni tih hi. Mi tam tak chuan he French attacker hian PSG a chhuah san thuai an ring a, mahse rin ai tak chuan a cham rei ta zek a. Mbappe hi Ligue 1 club lian tan hian pawimawh viau mahse, transfer hawn hun apiang hian club danga chuak mai tura sawi zingah a tel fo thin. 

Khawi club lamah nge a chhuah dawn a hriat loh a, Kylian Mbappe-a'n Paris Saint-Germain chhuahsan a duh tih an hriat rualin Liverpool hian an ngaihven nghal a, mahse, anni aiin Real Madrid an lut tuk rih niin a lang.

French pa hian Mohamed Salah hi thlak ta se, a speed thatna leh dribbling skills bakah a mit fing tak vang hian Premier League defender te tan chuan a tawrh hlelhawm ve viau ngei ang le. 

Kylian Mbappe hi kum tlem lai deuh atang khan Europe a goal thuntu duh awm ber pakhat a ni tan tawh a, Kum 22 mi hian PSG tana game 182 a khelhah goal 136 thun tawhin assist 66 zet a nei tawh a ni. French national team tana player pawimawh tak ni bawkin ram tan match 51 a khelhah goal 19 a thun tawh bawk. 

#4 Domenico Berardi
    Berardi-a, goal bula an chetla tak tak hi chu Liverpool lama Mohamed Salah ball bawh nat leh goal thun tura a vir lutuk te pawh a ang zawk hial a ni. Serie A lama right winger tha ber pawl Domenico Berardi hi Liverpool hma tawngah awm ta se, team-in a hlawkpui ngeiin a rinawm. Italian winger hi goal khung leh midang siam sak kawngah a that em vangin Mohamed Salah hi a tlak zo ngeiin a rinawm.

Berardi hian season liam ta khan Torino tan game 30- a khelhah goal 17 thunin assist vawi 8 a nei. Tun season-ah pawh a che che hran lo hle a, Italian top flight-ah hian game 5 a khelh tawhah goal 3 leh assist 1 a nei leh der tawh.

#3 Raphinha
    Premier League-ah season liam ta khan a tum khat nan a inlan a, he winger hian a club thar Leeds United tan danglamna a rawn thlen nghal. Tun season hian English top flight-ah hian tum sarih inlan tawhin goal thum a thun tawh. 

Raphinha hi tun nipui transfer window khan Anfield nen sawi zawm niin kal mai tura rin a ni hman. Liverpool midfielder Fabinho pawhin Reds tana khel tura a duh zia thu zep zo lovin,"Premier League lama Raphinha rawn lan hnu hian Leeds tan malsawmna niin a khel tha em em a ni," tiin a sawi lang hial. Fabinho chuan sawi zawmin,"Summer transfer bazar chhung khan Liverpool lama kal mai tur anga inbiakna chu a awm ngei a, thil a kal tluang emaw tih laiin Leeds lamah a cham rih ta zawk a. 

Tunah chuan Leeds player tha ber a ni mek a, Leeds khel tur team tena an enghelh leh ven ngun ngai an tih ber chu Raphinha hi a ni," tiin a fak. 

#2 Ousmane Dembele
    Barcelona attacker Ousmane Dembele hi Liverpool-a Mohamed Salah aiawh thei tura rin dang leh chu a ni. Tlem lai deuh atang khan Barca winger leh Liverpool hi sawi zawm an ni tawh. 

French ram mi hi a la naupang hle chungin Europe-a player talent nei tha ber pakhat a ni. A dribbling skills te, a creativity leh a goal thun thiam bik riauna te hian player danglam bik a nihna a pho lang a, Liverpool lamah pawh a chhawm thei ngeiin a rinawm. A that danglam bik zualna chu wing angin a khelh theih piah lamah centre-forward hnunga dingah pawh a lak tlak hle a ni. Liverpool hian Mohamed Salah-a'n club a chhuah san thulh a amah thlak turin Barcelona winger Ousmane Dembele hi a duh em em a ni. 

Dembele hian Barca tan game 118 a inlan tawhah goal 30 leh assist 21 a nei tawh a ni. Liverpool hian lei chhuak dawn ngat se, €50 million vel bawr chu insen an huam ve a ngai ang. 

#1 Federico Chiesa
    Liverpool-a Mohamed Salah thlak tura tha ber tur a ngaih a ni phak. Federico Chiesa hi season liam ta chhung khan Juventus tan a khel tha hle a, goal 15 a chhuih luh bakah assist 11 lai a nei. Liverpool mai ni lo Europe club lian tam takin a thiam em avanga an rim ruk reng a ni a, lak chhuah mai pawh a awl lutuk lo mai thei. 

Chiesa hian Liverpool zawm seng chuan Mohamed Salah aiawh turin right wing-ah  a khel thei nghal dawn a, he Juventus forward hi goal a thun theih piah lamah mi goal thun tur siam kawnga a that vang hian hriat a hlawh a ni. A taimak em vangin midfield a hnawh phui piah lamah hmatawng lam puih kawngah a thawh hlawk leh em em bawk. 

Share now