Aizawl March 23, 2023 : Vawiin khan MNF Adviser Dr. R. Lalthangliana chuan Lunglei LMC campaign neih mekah Ward hrang hrangah thu a sawi a. Heng hmuna thu a sawinaah Hnahthial bialtu hian LMC-ah an candidate-te an thlan tling chuan nasa takin an thawkho dawn tih leh mawh an phur ngam tih a sawi. 

MNF Adviser Dr. R. Lalthangliana chuan, "Ward hrang hrangah candidate tha tak mai kan nei hi beiseina a sang hle a, heng bialah hian anni aia tha tur dang an awm chuang lo. Lunglei mipuiten in mamawh te hi Lunglei chhuak ka nih angin hre vein ka in hria a. Lunglei khawpui hmasawnna tura mamawh te chu LMC-ah kan candidate-te inthlang tling ang a, chung ho nen chuan nasa takin kan thawkho dawn a ni," a ti.

Minister Dr. R. Lalthangliana chuan, LMC-a an candidate-te lo thlang tling a, a dintu MNF hian Lunglei tihhmasawn nan mawh a phur ngam tih sawiin, "LAD kha chu Lunglei khawpui tihhmasawn nan a bei tham hle. LMC-ah chuan tha leh sum hrawl takin khawpui tihhmasawn a theih dawn a ni. Chuti chungin Municipal nih avanga tawp tur Ni 100 inhlawhna hi, kum khat dawn chu kan la pe chhunzawm ang che u. LMC hi kum 2007 MNF sawrkarin Assembly-ah kan pass a ni a, tunah kan sawrkarna hnuaiah kan inthlang a, kan candidate-te in vote tlin chuan a dan a dang khawp ang. Nau chu a hringtu ngeiin a enkawl hian a thang tha thin. Tuna LMC-a kan thlantin turte hi kumin kum tawp inthlanpuia tling nawn leh ngei tur MNF sawrkar thar thawhpui turte an ni," a ti. 

Congress chungchang sawiin Dr. Thangtea chuan, "Congress hi central leh state tinah an tla nasa tih chu kan hre vek a, Mizoramah MLA panga an nei mek a, an MLA neihna bialte hi BJP tan lak mekna lai a a lo ni leh zel nen BJP hian seat hnih khat lo chhuhsak palh se la, inthlan lehah bial 5 an lak phak ka ring tawh lo. Heng lai bialah hian ZPM hian mi leh sa an nei mumal ve lo bawk. ZPM chu social media-ah nasa takin thu puar pawleng mai mai an rak pui a, a takah an kawrawng hle a. An tan kumin kum tawp inthlanah tlin ngaihna a la awm lo, an hotu lawkte inkar khikzia pawh mipuiin an hre vek," a ti bawk.

MZU Southern Campus chungchang sawiin Higher & Technical Education Minister Dr. R. Lalthangliana chuan, "Covid avanga hun rei tak hna kan thawh theih loh avangin kan rilru a na a, mipui pawhin min hriat thiam kan dil che u a ni. Lunglei mipuiin kum 20 tel kan thlir MZU Southern Campus hi kum 2020 January-ah Higher &  Technical Minister ka nih angin ka zin haw pahin sanction kan hmu ta. A hmun hma zawng zawng tihfel a ni a, DPR pawh engkim kan siam diam a, a thawktu tur lak leh building sak turte pawh Central-in covid nghawng avangin min pe thei rih lo. Hmannia Delhi ka zu kal khan ka nawr nawn leh a, a la fel thuai ang. Hei hi Mizoram sawrkar enkawl tur ni lovin MZU Tanhril enkawl tur a ni," a ti.