April 3, 2023; Lunglei Municipal Council (LMC) inthlan vote thlak vawiin a chhiar-ah hneh takin ZPM party in hnehna ah an chang a, seat awm zawng zawng an la fai vek a, vote tla zawng zawng atangin za a 49.27 (vote 14,852) an hmu phak. 

Saikuti Hall, Lunglei ah chawhma dar 10 atang khan vote tla te chhiar a ni a, mipui rin phak bak leh anmahni ZPM lam pawhin an rinphak loh tur khawpin, seat awm zawng zawng an la fai vek a, vote tla zawng zawng atanga a zahve deuh thaw an hui theih laiin, MNF in ward 11 a an vote hmuh belhkhawm chu 8,858 (29.38%) a tling.

Congress (INC) in ward 11 a an vote hmuh belhkhawm chu 6,037 (20.02%) niin, BJP vote hmuh zawng zawng 226 ni bawkin, NOTA ah 163 a tla bawk.

ZPM ticket a thlan tlin mi 11 zinga 5 te chu hmeichhia an ni a, reserved ward a tling 4 leh general ward atanga tling Lalhruaitluangi Sailo te an ni.

ZPM hian engtiang angin nge LMC chairman leh mawhphurhna dang chelh turte a ruahman dawn tih sawi mai theih a la ni lo a, Southern Headquarters Lunglei hruaitute leh General Headquarters lam inrawnin, ruahmanna an la siam dawn nia thudawn a ni.

(Party te vote hmuh zat hi a la dik tawk lo maithei a, a dik lohna erawh tam tham a ni lo ang. ZALEN NEWS)