Aizawl April 3, 2023 - Vawiin chawhma dar 10 atang khan Saikuti Hall-a Counting Hall pahnih ah Lunglei Municipal area huamchhunga Ward 11-a vote tlate chhiar an ni. Chhiar zawh a nih hnuah Lunglei District Municipal Election Officer Ramdinliani, IAS chuan tling thar te hnenah Certificate of Election hi sem nghal a ni.

Vote chhiarna ah hian Counting Hall pahnih buatsaih niin hall tinah dawhkan 12 theuh a awm a. Vote chhiar tan hma hian counting official-te duty dan tur Randomization tih phawt niin dar 10 atangin counting hi tan a ni.

Counting ah hian Lunglei DMEO Ramdinliani, SP Rahul Alwal, Election kalpui dan endik tura State Election Commission ina a ruat Election Observer pahnih Dr Andrew H. Vanlaldika leh Dr Lalngura Tlau, Municipal Returning Officer - Donny Lalruatsanga leh Pu M.Misael leh official dangte bakah candidate-te leh an agent-te leh media mi te an tel a.

LMC Election 2023 ah hian candidate 42 an awm a, INC, ZPM leh MNF te Ward tinah dingin Candidate 11 theuh an nei a, BJP in Candidate 9 an nei a ni. BJP Candidate din lohna Ward pahnih Ward No II (Serkawn & Zohnuai) leh Ward No IV (Venglai & Venghlun) ten candidate 3 neiin Ward dang zawngin candidate 4 theuh an nei a ni.

LMC inthlana Councillor thar te chu :  

Sitting L-R (Kawrlum Pink atangin) : W-X Judy Lalhriatpuii, W-VIII K. Malsawmkimi, W-V Zonunmawii, W- II R. Lalmuanpuii, W- I Lalhruaitluangi Sailo.

Standing L-R (Jacket dum ban bul ha atangin ) : W-IX Zorinsanga Hmar, W- VII K. Lalrinawma, W-IV R. Lalramzauva, W- III Lalzuithanga, W- VI R. Lalremsiama, W-XI Vanlalliana Pachuau