Aizawl March 10, 2023: Vawiin khan ZPM Friday political session neih a ni a, Upa Committee Chairman Rosiamhnuna Khawlhring chuan kaihruaiin General Secretary Lalmuanpuia Punte leh Thalai President Dr. C Lalrammawia ten thu an sawi a, LCM inthlan turah beiseina sang tak an neih thu an sawi. 

Lalmuanpuia Punte chuan, “ZPM hi Lunglei Municipal Council (LMC) atan kan inbuatsaihna a rei tawh a, nikum kumtir lam khan headquarters chuan committee dinin, southern headquarters te nen tlawmngai pawl te, Kohhran te leh party dang te sawmin inrawn khawmna leh sawihona te a kan lo buatsaih tawh a ni. Chutiang chuan Lunglei khawpuiin khawpui inrelbawlna tha tak, bultanna tha tak a neih theih nan ZPM chuan theihtawpin a chhuah a ni,” a ti.

Beiseina an neih san thu leh candidate an neih that thu sawiin ZPM General Secretary chuan, “LMC election-ah hian ZPM chu candidate nei tha ber party kan ni. Ruling party-in candidate an tifel har ber. Kan candidate-ten party dang te thlemna itawm tak an tawk chungin, Lunglei hmasawnna duh avangin ZPM candidate ni chunga an dingnghet tlat hi chhuanawm kan ti a, an duhtlannaah hian kalphung thar a lang nghalin kan hria. Lungleiah ZPM boruak a tha a, LMC inthlanah pawh sawrkarna siam theih ngei kan inbeisei hle a ni,” a ti bawk.

ZMP Thalai President Dr. C Lalrammawia pawhin thu sawiin, “Tuna MNF sawrkarah hian kan ramin a mamawhna avanga hmasawnna hnathawh (need based development) ni lovin, inthlan thlir chunga hmasawnna hnathawh (election based development) kalpui a ni hi a pawi hle. LMC inthlan dawn a nih avanga Chief Minister-in Lunglei panna kawngah kalpahah kawng siamna tur order a pe chawpchilh leh si te hian Lunglei mipuite harsatna a hun laia a ngaihsak loh zia a tilang a ni. Ruling party te chetziaah sawrkar sum party sum ang maiin an ta neih a, sawrkar suma hmasawnna hnathawh te erawh an ta neih leh si lo a, mipui sum tam tak a luanral phah a ni,” a ti.