ZALEN January 16, 2025: Mizoram sawrkar Home Department thuchhuak bawhzuia Lunglei District Bawrhsapin a din Inspection Team chuan Team Leader, Sub-Deputy Commissioner (i/c ILP) H. Lalthlengliana kaihhruaiin vawiin khan Lunglei Municipal Council (LMC) huam chhunga hnam dangte Inner Line Pass (ILP) an endik.

Lunglei District Bawrhsap-in ILP endik tura Inspection Team a dinah hian SDC i/c ILP chu Leader niin, Lunglei Sub-Divisional Police Officer chu Assistant Leader a nih bakah, Young Mizo Association (YMA) Lunglei Sub-Headquarters President chu Member a ni a. Inspection Team hi hmun hnihah inthenin, LMC huam chhung veng hrang hrangah ILP an endik a. Mi 20 vel ILP fel lo hmuh chhuah niin, dan anga ILP tinung tur leh thuneitute hmaa inlan tura hriattir an ni a. Lunglei District-a ILP endik hi a tul anga kalpui chhunzawm zel tum a ni.