Aizawl March 24, 2023: LMC Inthlan puala Congress Party Campaign Office hawnna, Serkawn a neihah MPCC Spokesperson Dr. Lallianchhung chuan, LMC-ah party dang sawrkar se MNF sawrkar hian thuneihna leh sum leh paiah a hrek ngawt thei lo a, a ti a, Congress party president chu eirukna sawi mam ve ngai lo niin a sawi.

MPCC Spokesperson leh Media Dept Chairman ni bawk Dr. Lallianchhunga chuan, "Sawrkar laipui atanga sum leh pai lo kal reng reng state sawrkarin ni 10 chhungin Municipal sawrkar sum bawmah a dah lut ngei ngei tur a ni a, hemi hun chhunga a dah lut hman lo a nih chuan chhuanlam siam theih a ni lo, a pung nen a chawi thin. Kum 2015-2020 inkar khan hun bituk chhunga State sawrkarin pawisa a dahluh hman loh avangin AMC lakah cheng nuai 84 chuang a chawi tawh a ni. LMC-ah  hian party dangin sawrkarna siam pawh ni se, MNF sawrkar hian thuneihna leh sum leh paiah LMC sawrkar hi a hrek ngawt thei lo," a ti.

Municipal sawrkarah kum lama naupang ringawt an that loh thu sawiin Dr.Lallianchhunga MPCC Spokesperson chuan, "Aizawl khawpuia kan Municipal Corporation-ah khuan mi puitling tak tak, tawnhriat nei tam tawh ho khu kan Corporator neih that ber ber an ni zel. LMC Ward Committee-ah Local Council aiawh te, prominent citizen te an awm ngei ngei a ngai a, heng ho kaihruai tur hian Kohhran leh mipui nawlpui pawhin mi puitling china an ngaih te hi an tha zel. Party feeling la na chi, mi zawng zawng tha lo vek anga ngai chi tan phei chuan mi puitling tak tak awmna Ward Committee hi felfai taka kaihhruai a harsa hle ang," a ti.

Aizawl leh Lunglei khawpuite hian duh thuhmun a nei tih sawiin, Dr.Lallianchhunga chuan, "Kum 10 dana sawrkar lai ninna (anti-imcumbency) lo thleng thin kha MNF sawrkar hnuaiah hian kum 5 ral hmain a lo thleng phut mai a, Mizoram mipui te hian MNF sawrkar hi paihthlak kan chak zek zek tawh a ni. COVID-19 hripui vanga hun harsa in tawh laia ngawi reng MNF sawrkar hi LMC ah thlan nawn in ba lo," a ti bawk.

MPCC Spokesperson Dr.Lallianchhunga chuan, "Mipui sum eirutute hi ram hmelma an ni a, politician an ni emaw Officer an ni emaw, heng ho eirukna hi ram hruaitu nih tum chuan an sawi mam tur a ni lo, a chhan chu hlemhletna hi kan ram tichhetu a nih avangin politician eirukna leh Officer eirukna hi a inang vek. Mizoramin kan mamawh ber chu eirukna laka fihlim, mi rinawm, eirukna sawi mawi ve ngai lo, Mizoram sum leh pai enkawl kawnga mi hming tha a ni a; chutiang hruaitu chu Mizorama political party lian zingah Congress party hi a nei awmchhun kan ni," a ti bawk.