March 29, 2023; Lunglei Municipal Council (LMC) inthlan vawiin a vote tla zat chu voters 40,548 atangin 30,111 (74.26%) a tling a, vote thlak lo 11,340 an awm. 

LMC inthlan hmasa ber atan hian tukin dar 7 atang khan boruak muanawm tak hnuaiah polling station 44-ah vote thlak a ni a, tlai dar 4 thleng vote thlak theih hun nimahse, voting machine chiang lo a awm avangin dar 4 hnu lam thlenga vote thlakna polling station a awm.

LMC inthlanah hian nikum October ni 14-a tlangzarh LMC final electoral roll chu hman a ni a. Electoral roll-ah hian vote nei mipa 19,123 leh hmeichhia 21,425, an vaiin mi 40,548 an awm. Vawiin a vote tla hi mipa 13,906 leh hmeichhia 15,934 bakah, service voters 271, an vaiin 30,111 (74.26%) a ni.

LMC inthlana vote tla te hi April ni 3 chawhma dar 10 atangin Saikuti Hall-ah chhiar tan a ni ang a. Counting Hall pahnihah dawhkan 12 ve ve a awm ang a. Inthlan kaihhnawih thil zawng zawng chu April ni 6-ah zawh fel vek tur a ni.