Aizawl: Nimin khan International Fund for Agriculturural Development ( IFAD) Design Mission Team Mr. S. Shetty, Team Leader, Mr Shriram Subramanium, Proramme Analyst leh Mr Bhavit, IDH-te chuan Mamit District chhunga tlangram lo neih dan tha zawk duangchhuak a, eizawnna ngialnghet dinna kawnga hmalakna tur leh hmachhawpte a hmuna enchiang turin Mamit an tlawh. IFAD team-te leh NLUP Line Department-te hi D.C Conference Hall, Mamit ah DC Lalbiaksangi kaihruaina in meeting neih nghal a ni a. IFAD Team te hian Mizoram chu tlangram lo neih dan tha zawk hmanga hmalakna tur atana thlan a nih thu sawiin , tihdanphung pangngai kalsana ruahmanna tha zawk duanchhuah ngei a nih an beisei thu sawiin he project hnuaia hmalak tum dan tlangpui a lem nen an entir a ni. Mamit District chu a ram leilung a thain eizawnna ngialnghet dinna kawngah pawh hmathlir tha tak neia kal a nih chuan beiseiawm tak a nih thu an sawi bawk. IFAD Design Mission Team-te hian vawiin hian Mamit District chhunga Bawngva, Darlak leh Tuidam khua NLUP tanpuina dawngtute a hmunah tlawhin an dinhmun an zirchiang dawn a ni.