Aizawl: Mizoramah corona virus avanga lock down puan anih hnuah Police case ziahluh chu nasa takin a tlahniam a, nidang ngaihtuahin sualna thleng a tlem hle.

Thudawn danin Pathianni Janata Curfew khan Police station hrang hrangah tang 22 an awm a, tang zingah hian zu kaihhnawiha man 12 vel awmin an tam ber a ni.

Thawhtan khan tang 37 awmin an zingah hian zu kaihhnawiha man 20 chuang an awm a, Thawhlehni khan tang 21 awmin an zingah hian zu kaihhnawiha man 15 an awm a. Nilaini khan tang 17 awmin tang zingah hian thupek bawhchhiaa khawlaia chhuak lui tam berin 14 an awm a, Ningani khan tang 48 lai an awm a, tang zingah hian thupek bawhchhiaa khawlaia chhuah luih vanga man an tam ber a, 34 an awm a ni.