Lockdown puan atang in 6772 in hripui kai tawh, 83% tualchhung, kaina hriat loh 26%

Admin - May 30, 2021

6772 (6.21%) in covid 19 an kai tawh a, heng zing 5652 (83.46%) te chu tualchhunga inkai an ni a, an zinga 1786 (26.37%) chu kaina hriat loh (community transmission) niin ram pawn atanga lo lut 1120 kai an awm bawk

Aizawl: Inkhuahkhirh/ lockdown puan (20th April) a nih atanga nimin thleng (Ni 40 chhung) in mi 6772 (6.21%) in covid 19 an kai tawh a, heng zing 5652 (83.46%) te chu tualchhunga inkai an ni a, an zinga 1786 (26.37%) chu kaina hriat loh (community transmission) niin ram pawn atanga lo lut 1120 kai an awm bawk a. Chawh-rual (average) a lakin kar liam ta khan nitin mi 237 in covid 19 an kai thar ang a ni a, Mizoram covid lo luh hnuah a san ber kar a la ni.   

Daily average

Inkhuahkhirh puan a nih (April 20) kar khan chawhrual  (average) in nitin mi 75 in hripui an kai thar ang a ni a, lockdown puan hnan ni mahse pun lam a pan zel tho a, kar 3-naah 180 ah chhoin kar 4-naah 160 ah a tlahniam a, chuta tang chuan chhoh lam pan zelin kar liam ta, kar 6-naah nitin 237 in hri an kai thar ziah anga chhut a ni.

Hri kai thar hi kar tinin pun lam a pan zel a, kar liam ta khan Mizorama Covid 19 lo luh hnua kai thar tam ber niin 1660 an tling a ni. Hripui thawh khatnaa kai tam ber 'thla' chu November 2020 niin 1089 in an kai a ni.

Tualchhung vrs put luh    

Hripui kai zawng zawng atanga chhutin put luh aiin tualchhunga inkaidarh a tam zawk zel bakah san lam a la pan zel a, kar 6 khaikhawmin 83.46% a tling a. A hniam ber lai April 25-May 1 ah 58.35% a ni a, May 2-8 chhungin 73.29%, May 9-15 ah 84.17% ah niin May 16-22 ah 96.21% ah zuangin kar liam taah 96.68% a ni.

Ram pawn atang put luh san ber lai April 25- May 01 niin 41.14% (354 cases) a ni a, heta tang hian a hniam lam pan zelin kar liam ta khan 3.31% (55) ah tlain a hniam ber kar a ni bawk.

Kaina hriat loh

Tualchhunga inkai atanga chhutin community transmission (kaina hriat loh) kar 6 khaikhawm chu 26.37% a tling a. Inkharkhip puan a nih kar 20th to 24th April  kha a san ber kar niin 37.60% a ni a, 25th April to 1st May inkarah 24.79% ah tlahniamin hemi atang hian a sang zawngin a kal leh a, 33%-34% ah kar 3 chu awm hmanin kar liam ta May 23-29 ah 29.32% ah a tla leh hrih a ni.

Discharge

Damlo chhuah tir hi kar 6 chhung khaikhawm 59.22% a ni a. Kar 6 chhungin kar 1 & 2 naah 30% leh 43% niin May 9-15 khan 77.11% ah a rawn chho a, a kar lehah 82.14% ah chhoin kar liam ta khan 57.61% ah a tla leh dawrh a ni.

Ni 40 chhung hian sample 108,916 en a ni.

Share now