Lockdown Tha mi SOP hi retheite lam hawia her rem theih se!!

Admin - Jun 19, 2021

Ni tin inhlawh thin te, dawrkai leh mi dawr nghaka eizawngte, motor (Taxi, etc.) hmanga ei zawngte, chawhmeh zuar te, huan siamtute tan chuan a buaithlak double thei

H.Lalhmachhuana
Zobawm In

Mizoram mipui, a bikin Aizawl khawpui chhunga ni tin eichawp zawng leh inhlawhfate tan, a thla tel total lockdown hman chu a manganthlak ta tak meuh a ni a. Kan SOP hman mek hi chu thla tin hlawh neite tan chuan sawisel tur a awm vak lo a ni thei (SOP duangtute hi thla tin hlawh nei deuh vek an ni mahna!!) Mahse ni tin inhlawh thin te, dawrkai leh mi dawr nghaka eizawngte, motor (Taxi, etc.) hmanga ei zawngte, chawhmeh zuar te, huan siamtute tan chuan a buaithlak double thei, SOP siam leh hman nihna a awm nual a. Chuvangin,  lockdown hi chhunzawm a nih dawn chuan thla tin hlawh neia ei zawng lo leh rethei zawkte tana khawsak phung ziaawm zawk tura SOP tha chi siam ni thei se – Entirna point thlem :

1.    Dawr hawn hunte hi tih tam/tih sei nise, Task Force/LLTF/VLTF te hian an huam chhunga dawrkaite erawh SOP zawm tha tura vil reng dan erawh awm thei se.
 
2.    Ni tin inhlawhfaa eizawngte chu, an awmna veng leh an thawhna veng LLTF ten a dik tak (genuine) te chu hnathawh phalna pe mai thin se, SOP erawh vawng tha ngei turin order bawk se.

3.    Huan/lo a feh turte tana 8:00 a.m. hma leh 5:00 p.m. hnu hun pek hi tihdanglam ngei tur a ni. ‘Lal pawh thlawhhma ring mi bawk a ni’ tiin Bible (Thuhriltu 5:9)-ah kan hmu. Khawpui chhung kawngpui hi office kaite tan chauha siam a ni lo va, traffic jam hlauh deuh chuan 9:00 a.m. – 10:00 a.m. leh 4:00 p.m. – 5:00 p.m. chhung hian feh turten Aizawl kawngpui paltlang loh hram tum nise tih a tawk em em a ni.

4.    Loan laa mleh dawrkai hmanga ei zawngtute chu lockdown hman hun chhunga an loan rulh tulte ngaihdam dan emaw siamsak a, sorkarin loan rulhpui dan emaw siam ni thei se.
    
    Kan Van Pathian hi ‘Mi retheite lam tang thin Pathian’ a nih avangin mi retheite lam hawia SOP hi siam rem dan awm se a tha hle lo maw? Isaia’n ‘A chhe lai siam thatu, mi awmna tura kawngte siam thatu’ a tih kha kan mamawh hle a ni lo’m ni?

Share now