Aizawl: Tourism department hotute hnen atanga thudawn danin Mizorama Tourist Lodge leh Picnic spot hrang hrang enkawl nan state sorkar-in kum tin cheng nuai 38 vel a hmang thin. Tourist Lodge leh Picnic spot hrang hrang siam nan hian sorkar laipuia Product Infrastructure Development for Destination On Circuit Scheme atangin sum hmuh thin a nih thu department hotute chuan an sawi a. A siamna sum hmuh bak a hnu leh lama enkawl zuina senso erawh state sorkar-in a tum thung a, a enkawlna senso atan hian kum tin cheng nuai 38 vel hman thin a nih thu Tourism hotute chuan an sawi. Thudawnna chuan Tourism department in a enkawl Tourist Lodge thenkhat chu chawi belha enkawl a nih thu an sawi a. Lodge hrang hrang enkawl nana sorkar-in kum tin sum a hloh sutkian nan mimal enkawl turin tender chhuah a ni a, Lodge 8 leh Picnic Spot 1 chu mimal enkawl tura tih fel a ni tawh a. Lodge 9 tihfel leh tum mek a nih thu Tourism hotute chuan an sawi. Tourism hotute chuan Lodge leh Spot mi mal kuta an dah thuah inremna felfai tak ziahpui an nih thu sawiin, mi mal enkawltute hian department-ah hman man (rent) chhung lutin kum 10 leh 15 enkawl hna an thawk dawn niin an sawi a. Hetihlai hian sorkar laipuiin Product Infrastructure Development for Destination On Circuit Scheme a tih tawp tak avang erawh chuan an hnathawh mek a khaihlak phah thu an sawi a, hna kal lai mek thawh zawh thuai a nih theih nan sorkar laipui pawh an nawr thu Tourism department hotute chuan Zalen palai an hrilh bawk.