Aizawl June 7, 2024 : Vawiin khan Congress Party chuan Congress Bhavan-ah ‘Friday Political Session’ an hmang a. He hunah hian MPCC President Lal Thanzara chuan thu sawiin, “Tun tum MP inthlanah khan kan beisei ang hmu lo mah ila, Congress in lawmna tur tam tak kan nei a ni. Auhla tha tak, ‘kan ram, kan hnam, kan sakhua himna’ kan nei a ni. He kan auhla hi party dang BJP thawhpui tuten aupui ve mah se, ram leh hnam, sakhua himna tiderthawngtu BJP thawhpui tu an ni,” a ti.

“Central lamah pawh I.N.D.I.A Alliance a kan thawpui te nen result tha tak kan nei a, sawrkar pha lo mah ila kan chak lohna a tlem hle a, kan hmabak a eng hle a ni. India ramah Congress an ral tawh tih te thenkhatin an sawi thin a, mahse Central-ah chuan Congress chu a tho leh mek ani tih tun inthlanah khan kan hmu a. Tun tumah hian chak zo lo mah ila, inthlan leh pekah hian Congress chuan Lok Sabha ah Congress kan chak leh ngei dawn a ni tih hi a chiang hle a ni," a ti.

“Kan ram bikah kan Police 1047 laiin vote an thlak theilo kha a pawi kan ti hle a, he thilah hian Congress party chuan Supreme Court thlengin thlen kan inhuam a, pawisa pawh a nuaih tel kan sen laiin inthlan result puanin min nang ta si a ni. He thilah hian sawrkar lai hian mawh an phur ah Congress chuan kan ngai a ni.

“Nagaland ah chuan Congress in MLA pawh kan nei tawh ngailo a, mahse MP ah chuan Congress MP an thlang tling tlat mai a. Hemi chungchangah hian Pu Lalthara IAS (Rtd) chu ka han bia a, ani chuan, ‘Naga mipuite hian Central politic ah awareness an nei tha ani ang’ a ti a ni. Kan thenawm Meghalaya ah pawh Congress MP an thlang tling a, Manipur-ah pawh MP pahnih chu Congress in an la ve ve a ni. Chuvangin Mizo mipuite pawhin kan ngaihtuahna kan sen a ngai a, Kohhran te pawhin nasa zawkin hma an lak a tulin ka hria a ni. Hmani lawkah BJP MLA, Kohhran up ani bawkin BJP hlauh inzirtir tha a tih loh thu a sawi te kha a vanduaithlak ka ti a. Graham Stains te pafa halhlum tute pawh BJP naute Bajrang Dal an ni a, an sawrkar leh an tanpui te sawrkar lai zel in Kristiante kan chep thin a, State dangah pawh sakhaw dang betute an chep thin a ni.” a ti.

Congress MP Candidate Lalbiakzama pawhin thu sawiin, “MP inthlan result a lo chhuak a, India ram hi a lawm a, BJP in thuneihna pumhlum an chang ta lo hi India tan a lawmawm a ni.

Inthlanah khan kan auhla kha auhla dik ani a, mahse mizo mipuite hian kan la ngaihtuah chiang tawklo niin ka hria. A taka kan intawnharh hunah chauh em ni kan harh dawn? Party angin em ni mipuite hian vote kan thlak zel dawn tih hi kan ngaihtuah a ngai a ni," a ti.

Congress party chungah ka lawm em em a, inthlan campaign lai a nasa taka tan la tute chungah ka lawm a, Kan President leh midang te pawh Zoram dung leh vang ka kal kualna ah min zui a, an chungah ka lawm em em a ni. Kan ram leh hnam tan chuan Naktukah pawh MP thlang leh dawn ila, ka ding zel dawn a ni,” a ti.