Aizawl; Mizoram Lok Sabha MP thlanna Zirtawpni kalta a vote tla zat chu 61.05% a ni a, hetah hian Tuikuk vote leh Postal ballot vote te a la tello a, heng zawng zawng nen belhkhawm anih hunah chuan vote tla zat hi 62% a tlin ngei rin a ni. Lok Sabha MP thlanna ah hian khawi hmun atang mahin buaina leh harsatna lian a thlen hriat a ni lo a, EVM leh VVPAT buaina tenau erawhchu hmun thenkhatah a thleng a, mahse heng te hi rang taka chinfel nghal an ni. EVM te hi vote thlak zawh veleh District khawpui panpui nghal a ni a, Observer, Political party, Candidate aiawh te hriatpuinain seal vek a ni a, vote chhiar hun May 16,2014 ah a dahna 'strong room' atangin lakchhuah leh a ni ang. Joint Chief Electoral Officer H.Lalengmawia chuan, "Mihring kan buai tawh avangin a kum telin MP inthlan ah hian vote tla hi a hniam zawng zelin a kal a, mahse tun tum MP inthlan ah chuan Party hrang hrang te, Media leh tlawmngai pawlte thahnemngaihna azarah kum 2009 a vote 51% chauh tla kha 61% a tla a. Postal vote leh Tuikuk vote nen chuan 62% a tling ngei dawnin kan hria a, kan lawm tak zet zet a ni," a ti. State dangah pawh MLA inthlan ai chuan MP inthlanah vote tla percentage hi a hniam zel tih sawiin MLA nen khaikhin theih a nihloh thu a sawi a. "Inthlan hmasa aia 10% ngawta kan sang hi lawm awm kan ti a, state dangah hetiang hi a awm ka ringlo a ni," Jt.CEO chuan a ti bawk. Joint CEO H.Lalengmawia chuan khawi hmun atang mahin complaint an dawnglo tih Zalen a hrilh a, vote thlakna khawl EVM 7 leh VVPAT 25 thlak a nih thu a sawi a. Heng te pawh hi a chhiat dan serious tak ni lovin fello zeuh awm, fimkhur vanga thlak mai an ni a ti a. Vote thlak hun chhung, zing dar 7 atanga tlai dar 5 inkarah vote thlak hmanlo an awmlo niin a sawi bawk. Tun tum Lok Sabha MP thlan ah hian Hrangturzo bialah vote tla tha berin 74.97% a tla a, Aizawl North I bial chu vote tlak chhiatna ber niin 52.07% a tla thung a ni.