Aizawl April 16, 2023 :  Mizoram Lokayukta-ah thubuai 48 ziah luh tawh niin, 17 chin fel tawh a ni a, kumin chhungin thubuai pakhat ziah luh a ni a. Hetihlai hian Lokayukta-ah thubuai chhuitu tur, Enquiry Wing a la awm lo. 

Mizoram Lokayukta-in thubuai an ziah luh tawh dan an tar lan danin March 6, 2023 thleng khan thubuai 48 ziah luh a ni tawh a, thubuai 17 chin fel tawh niin, thubuai kal mek 34 a awm.

Thubuai awm mek zinga 22 chu preliminary enquiry tih turin a inchiah mek a, thubuai 16 chu chhui zui turin ACB kutah a awm mek a ni.

Nikum chhung khan Lokayukta-ah thubuai 10 ziah luh a awm laiin, kuminah chuan thubuai pakhat chiah ziah luh a la awm a. Chakma Autonomous District Council (CADC) hnuai, Local Administration Department-a ei rukna chungchang a ni.

Hetih lai hian Lokayukta-ah Enquiry Wing a la awm lo a, hemi chungchangah hian tun hnai khan Mizo Zirlai Pawl (MZP) chuan thuchhuah siamin Lokayukta-ah Enquiry Wing din vat turin Mizoram sawrkar an ngen.

MZP tar lan danin Lokayukta-ah thawktu 93 awm tura tih a nih laiin mi 42 an awm mek thawktu indaih lohna mi 49 lai a ni a, tuna thawktu tam ber pawh department danga mi deputation-a pawh chawp leh contract basis deuh vek an ni.