July 15, 2022; Mizoram Lokayukta chuan a din atanga vawiin thlengin, eiruk thubuai chi hrang hrang 46 an ziak lut tawh. Thubuai ziah luh 29-te chu preliminary enquiry neih tura thutlukna siam a ni a, chutih laiin, complaint lut zinga pathum chu preliminary enquiry ti loin tihtawp a ni.

Lokayukta hian investigation wing a neih loh avangin chhui lailawkna (preliminary inquiry) ti turin AntiCorruption Bureau (ACB) leh Central Bureau of Investigation (CBI)-ah thubuai a thawn thei a, CBI-in enquiry an tih dawn chuan state sorkarin phalna a pek a ngai.

Preliminary enquiry tih hnuah thubuai 45 zinga thubuai 14 chu tihtawp a ni a, thubuai 19-ah chuan preliminary hearing nei tura order siam a ni. Preliminary hearing neih a nih hnuah thubuai pali tihtawp a ni bawk.

Thubuai 12 chu chiang zawka chhui (regular investigation) turin thutlukna siam a ni a, regular investigation report hi Lokayukta chuan dawn a la nei lo.

Mizoram Lokayukta chairman hmasa ber leh ni mek Lalsawta chu March 19, 2019 khan lak luh a ni a, chuta tang chuan Lokayukta hian a tak takin hna a thawk tan a ni. Tun dinhmunah investigation wing an la nei lo a, prosecution wing-ah erawh chuan mi pakhat an nei tawh a ni.