ZALEN June 7, 2026 : March, 2019-a Mizoram Lokayukta din a nih atanga vawiin, June 7, 2026 thleng hian Mizoram Lokayukta hnuaiah eiruk thubuai 94 ziah luh tawh a ni a. Chung zinga thubuai pahnih chu Central Bureau of Investigation (CBI)-in an chhui mek.

Mizoram Lokayukta hotute hnen atanga ZALEN thudawn danin din a nih tirh atangin thubuai 94 an ziak lut tawh a, chung zingah thubuai 51 chu chin fel (cases closed) a ni tawh.

Lokayukta-in thubuai an dawn zinga 13 chu chhui zawh a nih hnuah court thutlukna siam turin chargesheet thehluh a ni tawh a, thubuai paruka hming langte chu court-in thiam loh a chantir. 

Thubuai panga chu disciplinary proceeding tih tura tih a ni a, thubuai pahnihah court-in thil tisuala puhte chu thiam lohna nei loa a hriat avangin hrem nei loin thubuai a titawp thung. 

Thubuai pakua chu zir chian a nih hnuah preliminary inquiry neih ngai loah ngaiin tihtawp a ni a, thubuai pakua dang chu preliminary inquiry neih a nih hnuah chhui zui zel tul loah ngaiin tihtawp a ni bawk.

Lokayukta-in thubuai an ziah luh zinga chhui zui ngai nia hriatte chu Anti Corruption Bureau (ACB)-in an chhui tlangpui thin a, tun dinhmunah ACB-in thubuai chhui mek pakua neiin Mizoram Lokayukta hnuaia awm inquiry wing-in chhui mek pariat an nei.

Thubuai pahnih dang (MLC 31,54), Serchhip leh Champhaia Mizoram Rural Bank-a sum tihchingpen thubuai erawh CBI-in an chhui mek thung.

Mizoram Lokayukta-a eiruk thubuai thehluh hi lehkha pheka ziakin Mizoram Lokayukta office-ah pisa kai chhungin thehluh theih reng a ni a, heimi bakah hian email hmangin mizoramlokayukta@gmail.com emaw, mizoram.lokayukta@gov.in-ah emaw complaint thehluh theih reng a ni.

Hming awm lo leh thubuai thehluttute biakpawh theih loh a awm thin a, thu zawh belh ngai leh complaint kal zel dan tur hriattir turin complaint kalpui chhunzawm zel a harsa thin.

Complaint-ah hian thubuai thehluttuin a hming leh biakpawh theihna a ziak thin tur a ni a. A hming leh nihna thup a duh a nih pawhin thupsak tlat tur a ni.

Mizoram Lokayukta chairman hmasa ber, C Lalsawta, IAS (Rtd) chu March 11, 2019-ah lak luh a ni a, tunah hian Lalmalsawma, IAS (Rtd) chu chairperson a ni mek.