ZALEN, October 16, 2025: Vana Pa Hall, Aizawla Lehkhabu Pho Rûnpui 5 kalpui mek zelah a tawp ni, Ningani tlai thleng khan cheng nuai riat man dawn lehkhabu hralh tawh a ni.

Ningani zan dar 09:00 thlenga la kalpui tur, LPR 5 hi Ningani kal ta khan Home Minister K Sapdanga’n a hawng a, a ni khatnaah Rs. 1,69,588 inhralh nghalin a tawp ni thleng hian Rs. 7,90,463 man an inhralh tawh a, zan thleng inhawn tur a nih avangin cheng nuai riat inhralh tlin ngei beisei a ni.

Mizo Writers Association (MWA) buatsaih, LPR 5-ah hian ziak mi 124 kut chhuak pho chhuah mek a ni a. A buatsaihtute chuan chawhnu, tlai lamah tlawhtu an tam zual thin nia sawi niin a tawp zanah pawh hian tlawhtu an tam viau an beisei.

LPR 5-a ni tin sum chêt vel dan:

October 9, 2025 - Rs. 1,69,588

October 10, 2025 - Rs. 1,73,755

October 11, 2025 - Rs. 1,35,650

October 13, 2025 - Rs. 1,07,330

October 14, 2025 - Rs. 84,935

October 15, 2025 - Rs. 1,19,205 (04:30)

A vaiin - Rs. 7,90,463