Aizawl March 12, 2023 : Trophy humhim turin Armed Vengin inrintawkna an nei sang telh telh a, nilaini tlai dar 4:30 atangin Mahindra XUV3OO LPS Cup quarterfinal-ah Kawnpui Joint nen an intawng dawn.

Khua leh veng inelna hrang hrangah YMA football-a champion hnem ber leh vawi nga champion tawh Armed Veng an hlawhtling a, trophy an humhim a nih chuan Aizawl District Football Association buatsaih inter village tournament chanchina champion ngun ber leh vawi thum champion tawh Ramhlun South an nih rual dawn a ni.

Round of 16-ah Durtlang nen goal awm lova an inhnehtawk hnuah penalty pet hmangin an tlang a, Divya Player of the Match lawmman dawnhtu Lalawmpuia Hnamte chuan : "Inpuahchahna kan nei tha a, kan khel tha telh telh a, champion theih ngei kan inring," a ti.

Vawi thum an khelh tawhah Armed Vengin goal 10 thunin Richard Lalramnunpuia'n goal nga a tilut a, mi mala khung hnem ber zingah a tel a ni.

Rajiv Gandhi Stadium, Mualpuiah sawm bik team Kawnpui Joint-in Armed Veng lakah fiahna an hmachhawn dawn a. Round of 16-ah goal thum goal khatin thleng sang tura beisei leh nikum YMA football-a semifinal lut Salem Veng an hneh tawh a, beiseina an nei thar hle.

Thlen san tumin Mizo coach fak hlawh Malsawmkima an ruai a, captain C Zohmingsanga chuan : "Kan inrintawkna a pun belh zel a, rilru puthmang dik nen khelmualah kan inlan theih avangin beisei kan nei sang a, kan tumah kan chiang hle," a ti.

Kawnpui hian tournament kal mekah goal riat thun tawhin a zahve chu an striker Lalkrossmawia khung a ni a, Salem Veng an hneh theih nan Krossmawia bakah Robert Lallawmzuala leh Lalrintluanga'n goal an thun a ni.

Naktuk zan dar 8-ah Ramhlun South leh Vaivakawn an inkhel dawn bawk a, quarterfinal zawh a ni ang.