ZALEN, Dec. 05, 2024: Zudio LPS Pro Fight 2024 hmawrbawk a hnai a, Best Boxer nen mi mal chawimawina chi hrang panga sem chhuah a ni ang.

Pro Fight vawi 11-naah hian boxer 286 an tel a, heng zing atang hian Best Boxer, Promising Boxer leh Best Challenger thlan an ni dawn.

Best Boxer-in Rs 36,000 chuang man Panasonic Refrigerator leh trophy a dawng dawn a, Promising leh Best Challenger-in Rs 10,000 leh trophy an dawng ang.

2022 leh 2023-ah Laldinsanga’n Best Boxer chawimawina a dawng zawn a, 2023-ah Promising Boxer atan Vanlalenkawltira leh Best Challenger-ah Ramdinthara thlan an ni.

2022 khan Lalrinngheta’n Promising Boxer chawimawina lain Best Challenger-ah Yuri Lalbiakdika Sanate thlan a ni bawk.

Best Judge leh Referee hnenah Rs 7,500 leh trophy ve ve hlan a ni dawn bawk a. 2022 leh 2023-ah a zawnin Lalchhanhima Hnamte chuan Best Referee chawimawina dawngin, kum zawn thovin Best Judge-ah Lalmalsawma thlan a ni.

Nikum khan MST Motors-in Best Boxer hnenah Ather Electric Scooter a pe a, hei bak mi mal chawimawina hi 2022 atangin KT Enterprise, Ramhlun North-in a la tum vek a ni.

MI MAL CHAWIMAWINA:

KT Enterprise Best Boxer - Panasonic Refrigerator & trophy

KT Enterprise Promising Boxer - trophy & Rs 10,000

KT Enterprise Best Challenger - trophy & Rs 10,000

KT Enterprise Best Referee - trophy & Rs 7,500

KT Enterprise Best Judge - trophy & Rs 7,500