A hnek nat avanga hriat hlawh, Ramdinthara’n a hma aiin a hnek na zawk tih a sawi a, Bosch Home Appliances LPS Fight Night-ah Laldinsanga nen an intawng nawn leh dawn.

July 26 zanah LPS Arena, Falkland-ah round ruk chhung innuai tura tih an nih rualin, Fight Night-a inhnek paruk awm turah a pui ber an ni dawn a ni.

Pangzawl tlangval, Ramdina chuan, “Round ruk la khel ngai lo mah ila ka thei ang tih ka chiang a, kan inhnek nawn dawn a, ka huphurh lo. A hma aiin ka hnek a na zawk a, boxing thiamna lamah pawh hma ka sawn,” a ti.

MSR Gym, Upper Republic-ah boxing trainer a nih avangin a hranpaa inpuahchah ngai lovin a taksa a buatsaih reng a, tichak leh zuala fitness tha nei turin kar hnih deuhthaw inbuatsaihna hun a la nei a, a duh anga a inpeih hman a ring.

Nikum November khan LPS Pro Fight bantamweight title fight-ah Dinsanga nen round li an inhnek tawh a; Ramdina’n a tir lamah chiang tak takin a hnek a; mahse, tunlai Mizo boxer zinga tha ber pawl, Ramthar Lunglei tlangvalin bei letin hmuhnawm takin an innuai.

Round lina tawp nan second 27 chiah a awm tawh tihin ama thuin Ramdina a chawl ringawt a, a point paihsak a nih avangin a tawpah uiawm takin a tlawm a. Hei vang hian Pro Fight leh professional huanga a bitum la hneh vek, Dinsanga lehthal a tumna a puitlin zo ta lo a ni.

Ramdina chuan, “Professional dan ka hriat tawk loh vangin time-out ka la a, amateur-ah chuan an pawm mai thin a, ka chetsual phah ta a ni. Chutih rualin kum tluana inbuatsaih, Dinsanga kha inhnekah khan chak a phu zawk hrim hrim,” a ti.

Kum 21 mi, Ramdina tan professional huanga a inhnek vawi hnihna tur a ni a, a inlan hmasak bera a hneh loh nen an inhmachhawn leh dawn a, a rualpui Dinsanga’n professional boxing vawi ruk a khelh tawhah mi pali knockout-in a chak vek a ni.

Pro Fight welterweight champion, Lalruatzela Hauzel chuan Luangmual Lunglei boxer Lalmuanpuia a bitum ve thung dawn a, professional huanga a inhnek hmasak vawi hnihna Mission Veng tlangval hi a tlawm zawn a, nikum Pro Fight title a lak rualin a vawi khat nan a chak a, chak zawn tumin a inlan dawn a ni.

Hetih laiin inhnek vawi sarih awm tura tih a nih hnuah C Lalhruaitluanga’n a keah hliam a nei tih a sawi a, a khel thei dawn lo.

2023 Pro Fight middleweight title fight-ah Hruaia’n F Lalthanliana Junior a hneh a, an pahnih hian intawng nawn leh turin biak fel tawh a ni a; mahse, Chawngtlai boxer-in chhuanlam a neih leh si avangin Electric Veng, Lunglei tlangval Thanliana’n a tlawm tawhna chhan let ngei a tumna a puitlin thei dawn lo.

Light heavyweight huangah HC Johnkenty Vanhlimpuia leh R Malsawmtluanga inhnek turin ngaihven a hlawh ve thung a; Khelo India State Centres of Excellence hnuaia inzir lai, L Joseph Buihringpachha (Siaha) leh H Zomuanpuia (Kolasib) tan hun tha siamsak a ni dawn.

2023 Pro Fight title fight-a NT Lalbiakkima laka chak zo ta lo, Vanlalenkawltira leh Tuipui boxer Lalrinnghet an inhnek dawn a; Melthum tlangval, Emmanuel Vanlalthlengliana leh Chhinga Veng rawlthar, Benjamin Lalrindika an inhmachhawn bawk ang.

BOSCH HOME APPLIANCES LPS FIGHT NIGHT

@ LPS Arena, July 26, 2024

FIGHT CARD - Bout 6

BANTAMWEIGHT - Round 6

Laldinsanga (Ramthar, Lunglei) v Ramdinthara (Pangzawl)

LIGHT HEAVYWEIGHT - Round 4

HC Johnkenty Vanhlimpuia (Tuipui) v R Malsawmtluanga (Electric Veng, Lunglei)

WELTERWEIGHT - Round 4

Lalruatzela Hauzel (Mission Veng) v Lalmuanpuia (Luangmual, Lunglei)

SUPER FLYWEIGHT - Round 4

Vanlalenkawltira (Dinthar, Champhai) v Lalrinngheta (Tuipui)

LIGHT FLYWEIGHT - Round 3

Emmanuel Vanlalthlengliana (Melthum) v Benjamin Lalrindika (Chhinga Veng)

EXHIBITION BOUT - Round 3

L Joseph Buihringpachha (KISCE, Siaha) v H Zomuanpuia (KISCE, (Kolasib)