ZALEN, September 21, 2025: Mizoram Volleyball Association (MVA) leh LPS Vision Production-in inremna an siam a, October thla tira khelh tur, inter village volleyball tournament chu cable TV leh social media-ah live-in a pe chhuak dawn.

Zirtawpnia LPS Office, Zarkawt, Aizawlah MVA hruaitute leh LPS Director Lalsawmliana Pachuau an inkawm a, kum 2016 atanga Pro Volleyball League-a an lo thawh dun tawhna bakah MVA buatsaih inelna lian danga an lo thawh ho tawhna chhunzawm zel turin an inrem.

October 1-10 chhungin R Dengthuama Indoor Stadium, Mualpui, Aizawlah inter village volleyball tournament khelh a ni dawn a, LPS Vision chuan LPS cable TV-ah a tir atanga a tawp thlengin inkhel live-in a pek chhuah dawn bakah an YouTube channel-ah live-a tihchhuah a ni dawn bawk a, MVA hian an YouTube channel-ah live-in an pe chhuak bawk ang.

Veng leh khaw hrang hrang inelnaa tel duh tan Ningani thlengin hming pek theh a ni a, tournament hnuhnung ber, kum 2023 khan mipa 80 leh hmeichhia 27, a vaiin team 107 an tel a. Hmeichhe inelnaah Kolasib Diakkawnin nomawi humhimin final-ah set hloh lovin Thenzawl East an hneh a, mipa final-ah Khawhaiin set thum set khata Hunthar hnehin a vawi khat nan an champion bawk.

Nikum khan veng leh khaw inelna lian dang, YMA volleyball tournament neih a ni ve thung a, team 101, mipa 73 leh hmeichhia 28 telin mipaah Muanna Veng leh hmeichhiaah Bungkawn an champion.