Mizoram chhunga boxing inelna lian leh ngaihhlut hlawh ber Tata Yodha 4x4 LPS Pro Fight 2022  chu September ni 30, Zirtawpni zan khan khelh zawh a ni ta. Dr Zorammawia night, final zanah hian weight hrang 5 atangin Mizo boxer tha 10 ten fight an nei a, mipui hlu a hlawh hle a ni. 

Final zana boruak nei lian deuh ber super lightweight-ah, tun hnaia boxer boruak nei lian Vanlalawmpuia, Khuangthing leh 2015 Pro Fight champion HC Lalramfela, Chawngtlai te inhnek a hmuhnawm a, chak zawk tur rin thiam harsa khawpin an inhnehtawk. 

“Min hneh a tum bawk a, a hriat mai ang. Tun hma chuan Ramfela hi a rorum thin a, tunah chuan a chuai tawh. Vanlalawmpuia hun a ni tawh,” titu Awpa a vannei zawk a, split decision  hmangin a chak hram. 

ZALEN palai zawhna chhangin Awpa chuan,”Ramfela hi weight hrang hrangah a khel kual thin a, min huphurh vanga min hel thin chu a nih ka ring chiah lo na a, min cho a nih phawt chuan engtik lai pawhin re-match neih ka inpeih reng,” a ti.  

Sawi zawmin "Ramfela hi ka thianpa a ni a, ‘Awpa hneh ka chak avangin super lightweight-ah ka khel dawn a, ka inbuatsaihna ang takin ka bei ang,’tia media lama lo lang kha chu, chutiang tawngkam a hman loh thu a mah ngeiin min hrilh leh a ni,” a ti.  

Awpa hian an inhnek hmain,"Min hneh a tum bawk a, a hriat mai ang. Tun hma chuan Ramfela hi a rorum thin a, tunah chuan a chuai tawh. Vanlalawmpuia hun a ni tawh a, ambulance leh doctor an awm dawn bawk a, a nih nih kan ni mai ang," tiin a khingpui tur hi a lo vo lawk tawh a, a khingpui 2015 Pro Fight champion Chawngtlai chhuanvawr Ramfela lahin zam lo takin "Awpa hneh ka chak avangin super lightweight-ah ka khel dawn a, ka inbuatsaihna ang takin ka bei ang. Tu nge an nih tih lam aiin ka hmaa ding hrim hrim chu hneh vek ka duh," tiin a chhang let ve bawk.
Super lightweight champion Vanlalawmpuia  hi GIG Motors Fighter of the Night atan thlan a ni bawk. 

KT Enterprise Best Boxer a thlan Laldinsanga, Lunglei Ramthar chuan inhnek hmain,"Ka chak dawn tih ka chiang a, round hnih kan hmang zo lo ang." tiin a sawi lawk a, a sawi ang chiah chuan thleng dik lo mah se final-a a hmachhawn  Samuel Lalthlamuana, Saitual chu round 3-naah knockout-in flyweight-ah a champion.

2017-a boxing khel tan ve chiah Dinsanga hi Mizoram chhungah vawi sarih a champion tawh a, National level-ah pawh best boxer leh best challenger te a lo ni tawh bawk. Tun tum pro fight-ah hian a weight-ah chuan a chungnung hle a, a inhnek pui zawng zawng knockout hmangin a hneh fai vek thei a ni. Dinsanga hian thuk zawka professional boxing luhchilh a, sang tak thlen a duh thu a sawi.

KT Enterprise promising boxer a thlan Lalrinngheta, Tuipui hian an inhnek hmain, "Ka hmaa ding chu tu pawh ni se tun dinhmunah ka inringtawk a, ka chak ngei bawk ang," tiin a lo sawi lawk a, a sawi ang ngeiin a chak a ni. Mahse, "Eng thil nge thleng dawn ka hre lo va, a theih dan danin hnek tluk erawh ka tum a ni. Round khatnaah pawh a tul chuan kan zo mai ang," tia lo sawi lawk ve F. Zoramchhana lakah hian a chungnung bik lo hle a, split decision hmangin a chak hram a ni.  
 F. Zoramchhana hi November a khelh tur Asian title chuh tumin a inbuatsaih mek a ni. 

Super featherweight-ah champion zo chiah lo mah se Yuri Lalbiakdika Sanate, Vaitin chuan huaisen takin a tum pui a hmachhawn a, KT Enterprise best challenger-ah thlan a ni. 

Super featherweight champion Lalrosangzuala chuan an inhnek hmain,"Hmuhnawm tak a nih loh pawhin rapthlak tak a ni ang. Dam nawmzia leh hrehawm tawrh hrehawmzia kan hre dawn a ni," tiin Yuri hi a lo vo lawk a, mahse, "Kan khua Vaitin-ah LPS Pro Fight title hawn ka tum ruh hle a, ka taksa dinhmun a tha tawk a, theihtawp chhuahin ka bei dawn a, a pui thei ang berin a ni mai," tia a lo sawi lawk ang ngeiin theihtawp chhuahin a bei let a, vanduai zawkah tangin majority decision-in chak lo zawk ah a tang ta hlauh a, a duhthusam thin tihlawhtling tura Pro Fight champion a nih theihna hun tha chu a bawk pel ta rih a ni.

Super featherweight champion Lalrosangzuala hi a hnek nat avangin a tir atangin mi enbing a hlawh a, semi-final ah a hnek chhuah tlem avangin a talbuai hman tep a, mahse a tum ram thleng turin a thiam tawh tih fiahna a paltlang thei ta tho a ni.

Super welterweight champion C. Lalhruaitluanga, Chawngtlai chuan an inhnek hmain, inhnek a chak tawh thu leh tum dang zawng aia khel that a tum thu sawiin,"Inhnek tum dang zawng aiin ka hnek chhuak hnem dawn a, a dawng hnem khawp ang. Ka hnek tluk ngei pawh ka ring a ni," tiin lo in hrosa lawk mah se a khingpui Zomuansanga chu a hnek tlu thei ta chiah lo va, mahse majority decision hmangin a hneh ta tho a ni. 

Super welterweight final-a a khingpui Zomuansanga pawhin,"Ka khingpui tur hi boxer tha tak a ni tih ka hria a, huphurhna erawh ka nei lo. A tu emaw zawk chu kan na hle dawn tih chiah ka sawi thei. Hun remchang ka hmuh phawt chuan ka hnek tlu ngei ang," tiin a khingpui tur lakah a hnek nat zia lan tir a duh viau naa, hun remchang tawng lovin vanduai zawk ah a tang ta a ni. 

Dr Zorammawia Night ; Final Result

RESULTFLYWEIGHT 
Round 4
Laldinsanga (Ramthar, Lunglei) bt Samuel Lalthlamuana
Knockout (Round 3, 2:48 min)
Laldinsanga (Pro record - 2 win (2 ko), 0 loss, 0 draw)
Samuel Lalthlamuana (Pro record - 1 win, 1 loss, 0 draw) 

SUPER BANTAMWEIGHT 
Round 4
Lalrinngheta (Tuipui) bt F Zoramchhana
Split Decision (36-40, 39-37, 39-37)
Lalrinngheta (Pro record - 2 win, 0 loss, 0 draw)
F Zoramchhana.(Pro record - 4 win, 2 loss, 0 draw)

SUPER FEATHERWEIGHT 
Round 4
Lalrosangzuala bt Yuri Lalbiakdika Sanate
Majority Decision (39-37, 38-38, 39-37)
Lalrosangzual (Pro record - 2 win, 0 loss, 0 draw)
Yuri Lalbiakdika Sanate (Pro record - 1 win, 1 loss, 0 draw)

SUPER LIGHTWEIGHT 
Round 4
Vanlalawmpuia (Khuangthing) bt HC Lalramfela (Chawngtlai)
Split Decision (39-37, 39-37, 37-39)
Vanlalawmpuia (Pro record - 6 win (4 ko), 1 loss, 1 draw)
HC Lalramfela (Pro record - 4 win (1 ko), 1 loss, 0 draw)

SUPER WELTERWEIGHT 
Round 4
C Lalhruaitluanga (Chawngtlai) bt Zomuansanga (Khatla South)
Majority Decision (39-37, 36-40, 38-38)
C Lalhruaitluanga (Pro record - 5 win (2 ko), 0 loss, 0 draw)
Zomuansanga (Pro record - 1 win (1 ko), 1 loss, 0 draw)

GIG Motors Fighter of the Night (Rs 2,500)
: Vanlalawmpuia (Khuangthing)

KT Enterprise Best Boxer (Panasonic Washing Machine kg 8 + Trophy)
: Laldinsanga (Lunglei Ramthar)

KT Enterprise Best Challenger (Trophy + Rs 8,000)
: Yuri Lalbiakdika Sanate (Vaitin)

KT Enterprise Promising Boxer (Trophy + Rs 8,000)
: Lalrinngheta (Tuipui)

PC Lalnunmawia Trophy for Best Referee (Trophy + Rs 6,000)
: Lalchhanhima Hnamte (Armed Veng South)

PC Lalnunmawia Trophy for Best Judge (Trophy + Rs 6,000)
: Lalmalsawma (Hnahthial)

    Tata Yodha 4x4 LPS Pro Fight 2022 Champion te hian Dr Zorammawia chhungte hnen atangin cheng 50,000 leh medal an dawng theuh a, runners-up ten cheng 20,000 theuh an dawng bawk.