HC Johnkenty Vanhlimpuia’n professional boxing khelh a tumna tipuitling turin LPS Pro Fight Organising Committee chuan inhnekna hun siamsak a tum.

October-ah Pro Fight buatsaih turin ruahmanna siam fel a ni tawh a, hemi denchhen hian organising committee chuan Pro Fight champion lo ni tawh leh Mizo boxer dangte, boxrec-a an inziah luh theihna tur inhnek a huaihawt tel nghal ang.

Zan hnih awhin title fight neih a ni dawn a, champion kawnghren inchuhna ni lo inhnek dang zeh tel turah kum 2014 atanga 2019 thlenga Pro Fight lightflyweight champion NT Lalbiakkima a inlan thei dawn a, ani bakah Mizo mipui hmuh châk, Tuipui boxer Johnkenty Van-a’n professional a luh chilh theihna kawng zawn mek a ni.

Indian Navy boxer hian professional boxing khelh ngei a duh a, Pro Fight title fight ruala inhnek tura organising committee-in a dawrna chhangin thil châkawm leh phurawm tak a nihzia a sawi a, a hun azirin a inlan thei dawn.

Sipai lama an hotuten phalna an pe tawh tih sawiin, “Inhnek chu min phalsak a. Mahse, ka hman hun tur ka hre thei lo. Navy-in Services Championship kan thleng dawn a, October tawp emaw, November tir emawah a nih hmel a, a hun tur tak a la chiang thei lo,” a ti.

Pro Fight chanchina weight hrang pahniha champion thei awm chhun, Vana’n kum 2014 atanga 2019 chhungin middleweight leh lightheavyweight kawnghren a hnek chhuak a. Hetih chhung hian vawi 13 inhnekin a chak vek a, knockout-in tum 10 a chak a ni.

Tuipui chhuanvawr hian professional luh chilh tumin hma a la a, inhnek tura tihfel a nih hnuah vawi hnih harsatna a tawk tawh a, nikum August kha a hnuhnung zawk niin tun thlengin la puitlin lo mah se a la duh reng tih a sawi.

Pro Fight-ah boxer tel tur zat hriat a la nih loh avangin title fight hun tur ruahman theih a la ni lo va; chuti chungin Organising Committee chuan Vana inhnek theihna remchan zawnsak ngei a tum a ni.