RC Shirt House chuan Tata SK 612 LPS Pro Fight technical official-te thawmhnaw a tumsak leh dawn a, Mizoram infiamna huang chhung event lianthamah official shirt sponsor ni zawn rei ber a nih tawhna a belh chhah.

Kum 2009 khan Mizoramah boxing hmanga inelna hriat hlawh tan a ni a, RC Shirt House tel ve nghalin Pro Fight apiangin official shirt sponsor a la ni ngar ngar.

Management team nen a thuphunga inremna an neih sa rualin kum tinin Pro Fight buatsaih a ni lo va. Huaihawt a nih dawn hnai apiangin an inbe rem thin a, kum 15 chhungin a vawi 10 nan thawk dun turin thuthlung an siam thar leh a ni.

Thawmhnaw thui thiam, Aizawl khawpui chhung, Dawrpui leh Zarkawta a zawrhna dawr nei, RC Shirt House hian referee leh judge-te kawr, kekawr leh bowtie tha tak bakah official pawimawhte thawmhnaw hak tur a pe tel thin.

Mizoram infiamna huangah anni nena khaikhin tura nghet leh event liantham pakhata official shirt sponsor ni zawn rei hi an la awm ngai lo va. Management team chuan boxing tana an inpekna a ngaihlu a, Pro Fight hmelhmang tidanglamtu zinga mi niin a hria.

Hetih lai hian Thawhlehnni atangin Tata SK 612 LPS Pro Fight-a tel tum tan application form a lak theih a, ni nga chhungin boxer 92-in theh lut tawhin, LPS Office, Zarkawt, Aizawl atangin form 179 pek chhuah a ni tawh bawk.

Mizoram chhung leh pawn atangin kum 17 chin chung lam a duh apiang tan weight hrang pangaah tel theih a ni a; October 2 hian LPS Arena, Falkland Veng, Aizawlah tanin September 20 thleng tel tum tan form theh luhna hun hawn a ni.