Mahindra Pikup 4x4 LPS Pro Muaythai 2022 khelh mek chu nizan khan zan 10-na khelh niin quarter-final zan hnihna a nih a, National gold medalist an nih fur tawh avangin insual an thiamin a hmuhnawm tawh hle a ni. Nizan result leh a chak zawk te chanchin tawi.

FLYWEIGHT

Lalngaihawma (Hunthar) bt C Lalbiakliana (Chaltlang Mual Veng)
= Technical Knockout (Round 1, 1:54 min)

* Muaythai inelnaa la tel ngai lo kum 18 mi C Lalbiakliana lakah awlsam takin national muaythai gold medal pathum la tawh kum 19 mi Lalngaihawma a chak a, thiamna kawng hrang hrangah an inthlau.

BANTAMWEIGHT

Ramdinthara (Pangzawl) bt Paul HD Lalruatkima (Phuaibuang)
= Split Decision (30-27, 29-28, 28-29)

* Kum 21 mi Ramdinthara'n muaythai tawn hriat tlachham mah se national gold medal pali la tawh, kum 27 mi Paul HD Lalruatkima'n a kuttum hlauhawm taka chhuak nasa tak a dang hneh lo va, boxing khel ṭhin leh national kickboxing gold medal dawng tawh Ramdinthara'n huaisen takin a nawr tluan.

LIGHTWEIGHT

George Lalmuanawma (Chawnpui) bt Joshua L Sanate (Zemabawk)
= Technical Knockout (Round 2, 1:34 min)

* National gold medal la tawh, kum 25 mi George Lalmuanawma'n amah aia kum thuma upa, muaythai tawn hriat tlachham Joshua L Sanate lakah hriam takin a tir aṭangin a khel a, ke hmang thiam zawk a nih bakah na taka a hnek ṭhin hmangin round hnihna laihawlah a nuai tlawm.

Lalramsanga (Upper Sakawrdai) bt
Andrew Lalnunmawia (Zonuam)
= Retired (Round 2)

* Kum 21 mi Lalramsanga'n muaythai a luhchilh aṭangin kum khat vel chauh a la hmang a, chuti chuangin national gold medal pariat la tawh, kum 28 mi Andrew Lalnunmawia a nawr hneh a; kum eng emaw chen a chawlh hnua kir leh Nunmawia'n round hnihna a tawp rualin hliam a nei a, a khelh zawm thei lo.

WELTERWEIGHT

Malsawmtluanga (Dinthar) bt F Zohmangaiha (Zarkawt)
= Unanimous Decision (29-28, 29-28, 29-28)

* Kum 24 Malsawmtluanga'n ban sei leh pet thui zawk a nihna chhawrin, kum 18 mi F Zohmangaiha nen an thiam chin leh an thahrui a inchen a, an inkhawih hnem dun hle. Thiamna sang lantir zo lovin ngam takin an inbei tluan a, tharum nei leh awmkhauh zawk Sawmtluanga a dingchang hram.

D3 Haier Fighter of the Night
- Ramdinthara (Pangzawl)

* Semifinal lutte October 24, 2022 - thawhtanni zing dar 9-ah LPS Auditorium, Zarkawt-ah an inbuk ṭha leh vek dawn a, an inhmachhawn nghal ang.

Mahindra Pikup 4x4 LPS Pro Muaythai 2022 zan 11-na October 21, 2022 (Zirtawpni) : 8:00 PM - Bout 5 quarter-final fixture

FLYWEIGHT

TZ Munga (Suangbem, Myanmar) v Benjamin Zonunsanga (Luangmual)

BANTAMWEIGHT

Isak Lalruatfela (Bethlehem Vengthlang) v TC Lalrinawma (Thuampui)

LIGHTWEIGHT

Lalrohlua (Dinthar) v Ngursaimawia (Luangmual)

WELTERWEIGHT

Zarmawia (Chite Veng) v Vanlalchhuanga (Dawrpui Vengthar)

Muanpuia (East Phaileng) v Lalchhuanmawia (Republic Vengthlang)