ZALEN May 26, 2026 : Vawiinah khan Land Revenue & Settlement (LR & S) Minister B. Lalchhanzova chuan I & PR Conference Hall-ah press mite kawmin, an department hmalakna leh thawktu dinhmun hrang hrang a sawi.

Minister chuan tun dinhmunah LR & S Department hnuaiah hian post hrang hrang 518 awm zingah a chanve chiah hnawh khah a ni a. Post 259-ah te hian thawktu dah tawh niin, a chanve dang 259 zet chu a la ruak mek a, Mizorama Department hrang hrangah hian post indaih lohna a nasa em em a, Revenue Department indaih lohna hi chu a langsarin mipui phun a tih tam viau nachhan pawh hi a ni ang a ti.

LR & S Department hnuaiah thawktu indaih lohna a nasat thu sawiin, Surveyor 14 lak belh tawh niin, heng mite hi District hrang hrangah sem an ni a. A vawi khatna atan Vairengte leh Thenzawl Sub-Division-ah te Surveyor hi dah an ni bawk tih a sawi a. Tun dinhmunah Surveyor 30 dang la leh turin hmalakna a kal mek a ni a ti.

Revenue Field Worker (RFW)10 lakna tur sawrkar phalna (clearance) pawh hmuh a ni tawh a ti a. Thawktu indaih lohna chhawk zangkhai turin UDC 2, LDC 5, LDC (PE) 4 leh Group-D (PE) 2 lak belh an ni tawh thu a sawi bawk.