Aizawl: Land Revenue & Settlement department chuan kum kalta 2015-16 chhung khan lei man chhiah atangin Rs.10,52,55,986.00 an hmu. Revenue department hotute chuan kum 2015-16 chhunga chhiah atanga an beisei chu Rs. 10,18,00,000 a nih laiin Rs. 10,52,55,986.00 an hmu a, an beisei zat hi Rs. 3455986-in an khum niin Zalen an hrilh. The Mizoram (Land Revenue) Act 2013 (Act of No 5 of 2013) tlawhchhana vantlang hmuna chhiah an lak tur in a huam zingah sawrkar department ram atang chauha chhiah an lak thu Revenue department hotute chuan Zalen palai an hrilh a. Vantlang hmun biak-in, community hall, thlanmual, khelmual leh home-te chu sawrkarin suspend order a chhuah avangin lak a nih loh thu an sawi a, sawrkar department ram atangin chhiah chu la mahse tih hniam a nih tak vak avangin a tira an beisei zat aia tlem fe chhiah an hmuh thu Zalen palai an hrilh bawk. Zalen palai zawhna chhangin Revenue department hotute chuan sawrkar in biak-in, community hall, thlanmual, khelmual leh home-a chhiah lak rih lo tura a lo tih tawh chu sawrkarin thu dang a neih hma chu kalpuia chhiah lak loh zel a nih tur thu an sawi a. Sawrkar hotuten state dang tih dan zirchian phawt nise tia deparment an ngen angin zirchianna neih tum a nih thu an sawi.