October 14, 2022; Mizoram Larsap chuan sangha leh nungcha man khapna hun a puang a, man khap zingah Chakai, Chengkawl leh Kaikuangte a tel. Dan bawhchhiate chu thla 3 thleng lungin tan leh Rs. 5,000 chawitir theih an ni.

Mizoram sawrkar Fisheries Act, 2022 section 5(1) leh (2) behchhanin, Mizoram Larsap chuan, luia nungcha leh sangha chi hrang hrang te an inthlah pun hunchhunga tih chhiat leh tih buai an nih lohna turin leh, him taka an inthlahpun theih nan sangha leh nungcha man khapna hun a puang a, hemi hun chhung hian sangha leh nungcha man, tih hlum, an chenna leh nungphung tih buai khap tlat a ni.

Hemi chungchang a Secretary, fisheries department in notification a tih chhuah a tarlan a nih danin, lui humhalh hun chhung chu October ni 10 atanga December ni 18, 2022 chhung a ni a, luidung nungcha humhalh te chu, Nghalim leh Nghadawl (Garra leh Danio), Chakai, Chengkawl leh Kaikuangte an ni.

Humhalhin a huam chin te chu, Mizoram chhunga lui leh luite zawng zawng (Autonomous District Council Area huam tello in) niin, dan bawhchhiate chu Mizoram Fisheries Act, 2002 section 5(4) hmanga hremna; Thla 1 chhung lungin tan, thla 3 chhung pawhsei theih emaw, Rs. 5,000 chawitir emaw, a pahnihin emaw a ni.