Aizawl: Save Chite Lui Coordination Committee (SCLCC) leh Aizawl Theological College tangkawp buatsaihin nimin khan Synod Conference Centre, Aizawl-ah “Lui leh tuihna humhalh” chungchang zirhona (seminar) neih a ni. Seminar hi Lalmalsawma, IAS (Rtd.)  SCLCC founder Chairman chuan kaihruaiin Chite lui chu chhanchhuah anih theih nana seminar buatsaih anih thu a sawi a. “Sik leh sa inthlak danglam nasa lutuk hi mihringte sulhnu a ni a, tun hmaa thil lo thleng tur anga sawi thin, thing leh mau tihchereu nasat avanga kan environment lo chhe ta chuan tunah hian a takin min nang ta a ni,” a ti. Save Chite Lui Coordination Committee hi sawrkar hotute leh tlawmngai pawl hrang hrangte telna niin June 2, 2017 khan a ding tan a. SCLCC thutkhawm hmasak ber hi Raj Bhavan-ah Governor hova neih niin Mizoram Governor leh Chief Minister te hi SCLCC patron member an ni a, Chief Secretary chu Chairman a ni. Seminar-a thuhma sawitu Rochamliana, General Secretary SCLCC chuan Chite lui humhalhna phase I chu June 2017 atanga June 2018 chhunga kalpui a ni tiin, “Phase I-ah hian Chite lui chhanchhuah leh tihthianghlim kawnga mipui inzirtirna neih a ni a. Phase II hi August/September 2018 velah tan tum a niin hetah hian a takin lui khawih hna hi tan tum a ni,” a ti. Rochamliana chuan Chite chu Tuirial a fin hmain km 20 vela thui nia sawiin bawlhhlawh leh hnawmhnawk tinreng paih a nih avangin a tawp hle niin a sawi bawk.