ZALEN November 20, 2025: Lunglei High Powered Committee (HPC) chu vawiin khan an Chairman, Chief Minister Lalduhoma hovin High Powered Committee Conference Hall, Lungleiah an thukhawm a, Chief Minister chuan Lunglei-ah Mizoram State Universiry hmunpui tur hi Lungleia dah tum a nih thu a sawi.

Chief Minister chuan, "Mizoram State University Bill, Assembly lama lo pass tawhah Aizawl-ah a hmunpui dah tura lo tih fel vek lo ni mah se, Lunglei leh chhim lam mipuiten Lunglei-ah awm se an duh tih kan hria a. Chuvang chuan, dan chu a tul anga siamthat (amend) leh mai pawh huamin Lunglei-ah a hmunpui dah hi kan tum ta a ni," a ti. He mi chungchang hi Chief Minister hian chiang zawkin Lungleiah hian Press Conference a nei ang.

HPC Vice Chairman V. Malsawmtluanga, MLA pawhin, "Tun tum hi Chief Minister-in kan hmunhma ngeia HPC te meeting min neihpui tum khatna a ni a. He hmunah hian Lungleia a tum khatna atan Council of Ministers meeting a nghat tawh bawk a. Lunglei khawpui min ngaihsakzia a takin kan hmu chho zel a, a chungah kan lawm hle a ni," a ti.