Aizawl March 11, 2023: Nimin khan '3rd Session of National Platform for Disaster Risk Reduction' (NPDRR-2023) chu Vigyan Bhawan, New Delhi ah Prime Minister Narendra Modi chuan a hawng a, he hunah hian award ngaihhlut hlawh 'Subhash Chandra Bose Appda Prabhandan Puraskar Awards 2023' lawmman dawngtute zingah Lunglei Fire Station, Mizoram chu a tel.

He hunah hian Union Home Minister for Home Affairs & Cooperation Amit Shah leh Union MoS for Home Affairs Nityanand Rai te pawhin an telpuina NPDRR-2023 hawnna inkhawmah hian India rama mahni hnathawhnaa inpe, huaisen leh hnathawktha lawmman 'Subhash Chandra Bose Appda Prabhandan Puraskar Awards 2023' semna hun hman nghal a ni a. He lawmman dawngtute zingah Lunglei Fire Station, Mizoram pawh a tel avangin Mizoram atangin Fire & Emergency Services Director C.Lalzahngoa leh Fire & Emergency Services  SP Francis Lalnuntluanga Ralte te chuan Prime Minister kut atangin an dawng a ni. 

He lawmman hian certificate leh pawisafai cheng nuai 51 a keng tel a Lawmman semnaah hian kum 2021-a Lunglei ram kang chungchang video tawi tihlan a ni a, video siam tur hian February 2023-ah Delhi atangin officials te Mizoramah lo kalin a hmun ngei an tlawh a ni.

'Subhash Chandra Bose Appda Prabhandan Puraskar Awards 2023' dawng thei tur hian nomination 274 lut atangin Odissa Disaster Management Authority leh Lunglei Fire Station te thlanchhuah an ni a. Vawiina lawmman semna inkhawmah Fire & Emergency Services officials te bakah Mizoram Homeguards Commandant General cum Director Zosangliana Hualngo leh Dy. Secretary, Disaster Management & Rehabilitation Lalrinawma Traite te an tel bawk a ni.