Aizawl: MNF Sub. Hqrs. Lunglei ten Lunglei High Powered Committee sum Rs. 4,90,26,724.94 bo anga an sawi chungchangah nimin khan Lunglei District Congress Committee chuan Aizawl Press Club-ah thuthar lakhawmtute kawmin, sum chu bo a nih loh thu leh a hmannate an sawifiah a ni. LDCC President C.Lalhmingliana chuan thu sawiin, “Kum 2009-2016 chhunga HPC sum hmanralna hriat loh (sum bo) anga tarlan Rs. 4,90,26,724.94 chungchangah hian hetiang hi thil awm dan a ni. RTI zawhnaah hian kum 2009-2016 chhunga department hrang hranga sum pek chhuah zat, Office Expenditure leh Medical Reimbursement Bill te chauh zawh a ni a, Office Establishment atana sum hman Salary, Wages, Travelling Expenses etc. atan a sum hmante hi RTI zawhnaah a tel loh avangin chhanna-ah hian tarlan a ni lova, hengte hi hmanralna hriat loh (sum bo) anga tarlan a ni ta mai niin a lang," tiin a sawi a. Salary, Wages, TE, Rent leh O C te chu RTI zawhna-ah a tel miau loh avangin zawhna chhannaah telh a nih loh thu leh  sum chu  bo a nih loh thu Hminga chuan sawiin hna thawktute hlawh leh Office inrelbawlna atan dan ang thlapa hmanral niin a sawi bawk. LDCC President chuan ‘HPC Office hi 2.3.2015 to 27.3.2015 chhung hian Local Fund Audit (Account & Treasuries, Govt. of Mizoram) in HPC Office, Lunglei in a sawmna angin 2008-09 to 2013-2014 chhung atan a Audit tawh a. Accountant General Office, Aizawl in 31.10.2016 to 3.11.2016 chhungin-1.4.2012 to 31.10.2016  chhunga sum hmanna zawng zawng a Audit vek tawh bawk a ni. Audit Party pahnih hian sum bo thlau engmah an hmu lo a ni. Rs. 490,26,724.94 bo thlau ang a a tarlan hi engtia chhut chhuah nge keini chuan kan hrethiam lo a ni," a ti bawk.