Aizawl March 22, 2023 : Lunglei Municipal Council inthlana campaign-a kal MNF Advisers - Lalruatkima, TJ Lalnuntluanga, Robert Romawia Royte leh Aizawl Mayor Lalrinenga  Sailo te chuan Lunglei hmun hrang hrangah campaign an beih ngawrhn hle.

Vawiin khan Kikawn leh Bazar-ah Lalruatkima chuan thu sawiin, "MNF-in kan election manifesto kan tihlawhtling tha hle a, hripui avangin tihhlawhtlin loh erawh tlem a zawng kan nei. Lunglei Municipal Council din pawh hi kan election manifesto tihhlawhtlinna a ni a. LMC inthlan hial hmachhawn theia kan awm ta hi a lawmawm a, Lunglei mipuite ka lawmpui a ni. Lunglei hian hmasawnna kawng hrang hrangah khawvel tukverh a dak ve mek zel a, a lawmawm tak zet a ni," a ti a. "Ramin harsatna a tawh pawhin he MNF party kaltlang hian Pathianin a lo chingfel tawh thin a. Hun lo la awm zel turah pawh Pathian hruaina kan dawng zel ang," a ti.

MNF Adviser leh Minister ni bawk Robert Romawia Royte pawhin Lunglei veng thenkhatah MNF tan Campaign a nei mek. Farm Veng a tlawh naah Lunglei tana pawha pawimawh, Liandala Sports Complex tlawhin khawtlang hruaitute nên siamthat ngai lai te an en ho. Roberta chuan khawtlang hruaitute thu thlen hi thil ngaih pawimawh awm tak, Election Model Code avanga hmalak tan mai theih loh a ni, a ti. Ramthar veng pawh tlawhin, MNF Party mi leh sa te bakah Sports lam hruaitu te nên titi hona neiin Mizoram a AIFF pawmpui Standard Futsal indoor Stadium hmasa ber tur sak lai te, Basketball Court leh Volleyball Court sakna hmun tur leh Ramthar Football Field thar laih mek te a hmunah a tlawh bawk.

Rahsi Veng leh Sazaikawnah Minister TJ Lalnuntluanga pawhin hun hmangin, "Mipui hawiherah pawh ruling MNF thlantlin duhna a langin ka hria. Double Engine nen LMC hi a kal a ngai a. State sorkar hnuaia UD&PA atanga hnathawh tur a tahtawla pek tur a nih avangin, inhnerem taka ke kan pen theih nan, LMC sawrkar hi State sawrkar, amah siamtu nena a thawh dun hi a dik a. Chu chuan LMC hmasawnna tur leh changtlunna tur pawh a keng ber ang tih a chiang a ni," a ti. 

Aizawl Mayor Lalrinenga Sailo, MNF Adviser pawhin thu sawiin, LMC ding mek chungchangah insawithaihna awm mek chu pawi a tih thu a sawi a. "Municipal-ah chhiah hlauhawm leh rit tham a awm lo, hlauh tur a awm lo. Municipal Council hi mipuite tana ṭha tur leh khawpui hmasawnna tur a ni," a ti.