ZALEN August 15, 2026: Riangvaite Thlanmual bul, Lunglei-a bawlhhlawh paih dan chungchangah Vanramchhuangi (Ruatfela Nu) chuan vawiin khan Lunglei Police Station-ah FIR a thehlut a. Lunglei Khawpui bawlhhlawh, khawpui chhung (Municipal Area ) a paih chu sual thiltih (Crime) a nih thu a ziak lang.

FIR a thehluhah Ruatfela Nu chuan Lunglei khawpui bawlhhlawh paihna chu District Urban Development Officer (DUDO) enkawl nge Lunglei Municipal Council (LMC) tih pawh chiang lo chu August Ni 14 Zirtawpni khan a hmunah an enfiah thu a sawi a; an enfiah chhan chu kum 2024 atanga Thal khawro laia kang ziah, a khu tuartute'n Centre for Environment & Social Justice (CESJ) a an zualko vang leh, CESJ hian bawlhhlawh sawngbawl that loh chu thilsiam tinreng tana chhiatna thlentu anih avangin, a mawhphurtu department te High Court /Supreme Court leh National Green Tribunal (NGT) a an thlen thin vang a nih thu a sawi.

Vanramchhuangi chuan a nihna takah chuan Lunglei Khawpui bawlhhlawh, khawpui chhung (Municipal Area ) a paih chu sual thiltih (Crime) a nih thu sawiin Thalah hal khuk a ni ziaha, a khu rimchhe tak chu thil siamte nunna tichhe thei a nih avangin, Fura bawlhhlawh tinreng, tenawm tawpkhawkte Kawngpui sira paih chu sual thiltih anih loh chuan eng thiltih nge ni ang ti a ziakin, Thilsiam nunna nei zawng zawng bakah tui leh tuia cheng nunna nei te, hnim leh thing leh mau, a hmuna cheng nungchate tan chhiatna thlentu anih avangin he thil ti tute hi mana Dan anga hrem ni rawh se tih chu a duh ber a nih thu a sawi.

August Ni 14aa Lunglei Khawpui Bawlhhlawh paihna a tlawhnaah Vanramchhuangi chuan Mizoram hmun dangah pawh bawlhhlawh, a paihna hmun tura paih ni lo tam tak a awm thu leh chung thilte chu a lo buaipui nasat tawh thin thu a sawi a. Gauhati Aizawl Bench ah PIL an thehluh tawh thu sawiin Hauruang daia bawlhhlawh paih thin a nih chungchangah “Dan kengkawhtu, UD & PA leh LMC te an awm a; Uih hi min hnim tir reng suh se, Bawlhhlawh hal khu pawhin min ti hrehawm tawh suh se” tih chu Lungleia a lo kal chhan a nih thu sawi. 

Sazaikawn Local Council Vice Chairman C. Khawlthanga chuan Riangvaite Thlanmual bula Bawlhhlawh hal khu chu thal laia a nasat thu leh an veng chu Bawlhhlawh hal khu in a bawh nasat thin thu a sawi a; Bawlhhlawh hal khu avanga hian Kum upa lam, mi pahnih chu an boral ta nia an hriat thu sawiin Hriselna lamah an chhiah phah hle nia an hriat thu a sawi.