Aizawl March 25, 2023 : Vawiin khan Mizo National Youth Front (MNYF) buatsaihin Lunglei khawpui chhung hmun hrang hrangah vantlang inkhawm neih a ni a. He hunah hian MNF Adviser hrang hrang, Dr.R.Lalthangliana, C.Lalrinsanga, Lalruatkima, Robert Romawia Royte, Ramthanmawia, Dr K Pachhunga, Dr Vanlaltanpuia bakah R. Lalhnuna PAC leh MNYF Hqrs Vice President Zodinpuia ten thu sawina hun an hmang a, MNF aia Lunglei tana hma la tha an awm lo niin an sawi hlawm.

Thusawitu te chuan Municipal Council chu Lunglei mi hmasa te leh tlawmngai pawl te pawhin an lo dil tawh thin a nih thu an sawi a, MNF sawrkar in Lunglei mipuite hmasawnna tur a duhsak avangin a tihhlawhtlinsak ta an ti a. Lunglei khawpui thuam famkima thuam MNF in a tum dan te an sawi a ni.

Lunglei khawpui chuan Mizoram sawrkar nen tangkawpin a inenkawlna tur Budget a siam chho ve tan dawn a, Budget siamthei tu tur leh pass thei tur te thlang chhuak turin Mizoram sawrkar chuan hma a la mek an ti. Lunglei khawpui dinhmun tha zawk a siamtur hian MNF sawrkar chuan nasa takin hma a la a, Mizoram University (MZU) southern campus dinna tur pawh MNF sawrkar chuan sualchhuak tawh an ti a, Mizoram sawrkar in mawhphurhna leh tih tur a neih ang ang te a tihhlawhtling tawh tiin sawrkar laipui hmalakna an ngaihchan mek niin an sawi.

Mizoram District capital dang a awmlo DIG (southern range) Lunglei khawpui ah sawrkar chuan a dah an ti a, Lunglei chu Municipal Council inenkawlna hnuai a awm tur mah nise mipuite'n ni 100 inhlawhna an kalpuizel theihnan MNF sawrkar chuan budget ah a dahfel tawh niin an sawi bawk.

Lunglei By-pass road, double lane tha zawk a siamna tur tender pawh Ministry of Road Transport & Highway hnuai atanga chhuak mai thei niin an sawi. Lunglei khawpui chhunga zirna leh thalaite infiamna kawng hrang hrang siamthatna kawngah MNF sawrkar tluk a hnathawk nasa an awm lo, an ti

SEDP semna kawngah MNF sawrkar chuan a intiam angin hma a la chhozel a. SEDP pilot project hnuaia vawk vulhtu chhungkaw 300 chuang hnenah cheng Nuai 3 pek tawh an ni a. Chhungkaw 60000 hnenah tanpuina cheng 50000 sem chhuah mek a nih bakah, 2nd phase atan chhungkaw 60000 chuangte hnenah SEDP cheng 50000 sem tura hmalak chhoh leh mek a ni bawk a. SEDP cheng nuai 3 aia tlemlo an dawn vek theihna turin sawrkar chuan tanpuina hi kal chhohpuizel a tum bawk a ni.

Tunhnaiah Indian National Congress (INC) hotu lu Rahul Gandhi an criminal case a neih avanga Lok Sabha MP a nihna hlihsak a nih hi MNYF chuan pawi an tih thu leh Mizoram chhunga Congress party te an tawrhpui thu an sawi bawk