ZALEN May 20, 2026: Mother's Day, 2026 lawm nan Lunglei District Hub for Empowerment of Women (DHEW), Women & Child Development (WCD) te huaihawtin vawiin khan Lunglei-ah leh Lungsen- ah a vawi khat nan "Nu Chhuanawm Chawimawina" hun hman a ni a. 

Lunglei District atanga fate enkawl puitlinna kawnga nu chhuanawm pahnih – ZD Ramhmingthangi (Electric Veng, Lunglei) leh P. Malsawmtluangi (Lungsen) te hnenah thuziak (citation) leh pawisa fai ₹5,000/- an hlan an ni.

ZD Ramhmingthangi (64) hi Thehlep khuaa piang leh seilian a ni a. Fa pathum – C. Lalrammawia (Kum 36), C. Lalrinawma (Kum 34) leh Lalhmunmawia Chawngthu (Kum 31) te a nei a. A pasal Pu C. Chawnghmingthanga chuan kum 2000 khan a boralsan a; a boral lai hian an fa naupang ber chu kum 5 mi niin, a upa ber kum 10 mi a ni thung. 

A fapa upa ber C. Lalrammawia hi MBBS niin, tunah Civil Hospital Aizawl leh LRM Hospital-ah a thawk mek a. A fa lai C. Lalrinawma hian Mizoram Polytechnic Lunglei atangin Diploma in Computer Science & Engineering zovin, chumi hnuah NE-3-ah inziak tlingin, NERIST Arunachal Pradesh-ah B.Tech a zir leh a. Chumi hnuah GATE-ah inziak tlingin, NIT Tripura aṭangin M.Tech a zo leh a ni. A naupang ber Lalhmunmawia Chawngthu chuan B.Com a zawh hnuah a nu hna thawhpuiin, sumdawnna lamah a kal zui ve bawk.

P. Malsawmtluangi (Kum 50) hian kum 2012 khan pasal a sun a. A pasal C. Lalhriatpuia nen hian fanu pakhat leh fapa 2 an nei a, a unaute fa mipa 2 a awmpui bawk a. A pasalin a thihsan lai hian an fate hi pawl 5 hnuai lam vek an la ni. P. Malsawmtluangi hian a pa Middle School Peon pension chu chhawmin, a fate enkawl nan a innghahna ber a ni a. 

Ran vulh leh rawra chhu te'n a inhlawh ṭhin bakah, inhlawhna remchang a hmuh ang angah a thawk thin a. National Highway–302 laih avanga zangnadawmna an lak chuan a fate enkawlna kawngah a pui nasa hle bawk. P. Malsawmtluangi fate chu – C. Lalhungchhungi (BA), C. Lalnunsiama (BA) leh C. Lalramnghinglova (MBBS 2nd year at ZMC) te niin, a u fa a enkawlte chu – C. Lalrindika leh Jacob Ramdinpuia (BCA) te an ni.