Aizawl March 13, 2023: ZPM chhung inkhawm vawiin khan neih leh a ni a; He huna thusawitu R Lalthatluanga, PAC member chuan, 'MNF ministry hian Lunglei khawpui hi a ngaihsak lo mang e aw a tih theih,' a ti a, Lunglei mipuite chu an ngaihtuahin harh thar se a duh tih a sawi a, khawpui nuam leh changkang an neih theih nana vote thlak turin a sawm. 

R Lalthatluanga chuan, “LMC inthlan campaign kick-off turin mi engemawzat an kal a. Lunglei khawpui hian hre reng se ka duh chu, chhimlam hi engatinge MNF ministry-ah hian ngaihthah an nih? tih hi. Covid hripui hluar laiin Lunglei khawpui tan MLA pakhat chuan RTPCR khawl thar a leisak a, vawiin thlengin sawrkar hian a bunsak duh lo a ni. Thenzawl piahlam kawng a chhe em em a, an han siam tha a, fur khat pawh a daih lo. Budget-ah chhimlam mipui thleng phak tur an dah lo a, he ministry hian Lunglei khawpui hi a ngaihsak lo mang e aw a tih theih. Heng te ngaihtuah hian Lunglei mipuite hi inngaihtuah harh thar se ka duh a ni,” a ti a. 

Chhimlam atangin mi thiam tak tak an chhuah thin thu sawiin, “Chhimlam atangin mihrâng tam tak an lo chhuak thin a, mifing tam tak an lo chhuak tawh thin a, Zoram arsi lian kan tih te pawh chhimlam atang hian an lo chhuak thin. Lunglei khawpuiah mi thiam tam tak an awm a, tun tum LMC inthlan lo awm turah hian fing takin thil an tih ka ring. Anmahni tana tha tur hi engvangin nge anmahniin an vote chhuah mai loh ang? Tun tumah hian kan candidate-te hi an fel ber, an tha ber, an thiam ber kan ti hauh lo; amaherawhchu Lunglei mipuite dikna leh huaisenna nen, Municipal pahnihna tur Lunglei hi model khawpui ni ngam turin kan chah duh a ni. Reilote nawmsakna hnawla nakina an lawmman hmuh tur zawk thlir chunga vote thlak turin kan sawm a ni,” a ti.

ZPM PAC member chuan, “Congress leh MNF chhungkuaah hian mifel leh mithiam tam tak an awm, mahse a chunglam atanga inkaihhruaina tha a awmloh chuan thil tha an ti thei chuang lo. Keini chuan collective leadership tiin thuneihna insemtlan a, a dik chu dik, a dik lo chu dik lo tiin kalphung dik lo te siamtha a, mipui thleng phak budget siam a, mipui ten lei rem an rah theih nan ZPM chuan kalphung thar hi kan aupui a ni,” a ti a. "Fak tlak chu fak ila, sawisel ngai chu sawisel ngam ila. Ram rorelnaah mi tha leh mi dik ten an nihna pawh lanchhuah tir ngam lo kalphung hi kan duh lo. Thil reng reng a nihna ang taka a lo lanchhuah a, langtlang sawrkar kan neih theihna turin Pathian duhzawng anga kan thawhrimna chuan, a malsawmna changin ZPM hi a hmanrua kan ni thei ang,” a ti bawk.

He hunah hian Working President K Sapdanga chuan kalkhawm te hnenah Lunglei Minicipal Council (LMC) Campaign Committee hmalakna tlangpui a hrilhfiah bawk a ni.