ZALEN July 13, 2026: Lunglei District Police Cyber Cell te chuan kumin 2026 kum chanve, January ni 1 atanga June ni 30 inkar chhunga 'n phone bo report an dawn zinga an chhui chhuah phone 64 chu a neitute kutah an hlan let tawh.

Lunglei District hnuaia Cyber Cell, Lunglei Police Station te chuan kumina phone bo report an dawn atangin phone bo 64 chu chhui chhuak tawhin, an hmuh chhuahsak veleh a neitute hnenah an hlan let nghal zel a. Phone bo hmuh let zawng zawng hi a hun lai zela a hlut zawng chu cheng nuai 10.73 (₹10,73,032/-) vel a ni.

Lunglei District Superintendent of Police J. Lalmuankima chuan phone bo report an dawnte chu Cyber Cell te'n ngawrh taka chhui zuiin, an phone hmuh lette a neitute kuta an hlan let nghal bakah, phone bo chungchanga dan bawhchhia man chhuahte chu thubuai siamsak ṭhin an nih thu a sawi. 

Phone bo a man phu lova hniama lo leisaktute pawh dan anga thubuai siamsak thin an nih thu sawiin, phone hlui (secondhand) lei kawngah mi tinte fimkhur tur leh hriat chian loh chu lei lo tur te, phone hlui zuar rinhlelhawm an awm chuan a rang lama Police te hriattir thuai thin turin mipuite a chah.