ZALEN, March 11, 2025: A vawi khat nan Lungleiah professional boxing huaihawt a ni dawn a, WBC Youth champion Laldinsanga’n ram dang boxer bitumin khawtual boxer dang, F Lalthanliana Junior a inlan bawk ang.

High Power Committee Lunglei chuan an khaw tlangval leh Mizo professional boxer zinga hlawhtling ber ni mek, Dinsanga inhnek huaihawt turin hma a la a, LPS Promotion nen thawk dunin zan hnih awh turin ruahmanna an siam a, April 24 leh 25-ah inhnek pui tham tak buatsaih an tum.

Pro Boxing a luh chilh atanga vawi 10 a inhnek tawhah Dinsanga chak vekin February 7 khan Bangkok-ah awlsam takin Sarawut Jiamthong a hneh a; a inhnek hnuhnun ber niin nikum November 24 khan Bangalore-ah WBC Youth bantamweight title a chuh a, Michael Decardi Nelson-a lakah phu takin a chak.

Ramthar Lunglei tlangval hian 2022 LPS Pro Fight atangin professional a luh chilh a, nikum December khan a vawi thum nan Pro Fight-ah champion-in best boxer-ah kum thum a zawnin thlan a ni bawk.

Pro boxing a luh chilh hnuah a pianna leh sei lenna, Lungleiah vawi khat mah a la inhnek lo va, hun tha a neih theih dawn avangin a phur hle a. Chutih laiin a awlsam dawn lo va, a hmaa ding turin India ram dang pawn atangin boxer chah luh a ni ang.

2024 Pro Fight middleweight final-ah Electric Veng Lunglei tlangval, Thanliana’n champion lai, C Lalhruaitluanga, Chawngtlai a hneh ve thung a, a vawi khat nan Pro Fight champion a nih atangin a inhnek zui leh lo va, Lungleiah a vawi khat nan pro boxing huanga chak tumin a inlan dawn a ni.

Leitlangpuia inhnek tur zingah WBC India champion Vanlalawmpuia a tel dawn bawk a, Khuangthing boxer hian February 7 khan Thai khawpuiah Supachat Sukonthamanee hnehin Mizo zinga pro boxing khel tam ber a ni a, vawi 15 a inhnek tawhah tum 11 chakin a inhnek hnuhnun tum ngaah a chak vek a ni.

Zan hnih chhungin zan khatah inhnek vawi nga emaw, vawi ruk emaw ve ve awm tura tih a ni a, Mizo boxer thate bakah Indian leh ram dang boxer-te an inlan dawn.

WBC India atangin boxrec-a ziak lut tur supervisor chah luh a ni ang a, Lunglei khawpuiin a la tawn ngai loh tawngin Aizawl tih loha Mizoram chhunga professional boxing thleng hmasa ber a ni dawn a ni.