Luton Town captain Tom Lockyer-a chu Inrinni zana Bournemouth nên an inkhelh tuma cardiac arrest avanga khelmuala tlua bawihsawm a ngaih hnuah damdawi in a chhuahsan thei ta.

Club chuan kum 29 mi hi Implantable Cardioverter Defibrillator (ICD) vuahsak a nih thu an sawi.

Luton hian cardiac arrest avanga a captain tluk chhan hi May thlaa Championship play-off final-a atrial fibrillation nen a inan loh thu an sawi bawk.

“Dam lam panin a awm tih chanchin kan puang hi kan lawm tak zet a ni,” tiin club thuchhuah chuan a tar lang.

Inrinni zan inkhelah khan Lockyer-a hi minute 59-ah tluin club pahnih player leh damdawi thiamten an buaipui nghal a, zawn chhuaha damdawi in panpui nghal a ni.

Vitality Stadium-a inkhel hi 1-1 a nih lai a ni a, Premier League chuan hun remchangah a bul atanga khelh that leh turin ruahmanna a siam tawh.

Luton, Lockyer leh a chhungte chuan Bournemouth, an fan-te leh Lockyer-a bul thleng hmasa ber, Phillip Billing te chungah an chet dan avangin lawm thu an sawi.

Bournemouth pawhin, “He chanchin thar aia lawmawm thu dang a awm chuang lo. Dam tha zel turin Tom-a hi duhsakna kan hlan,” tiin X-ah an tar lang.

Lockyer-a taksaa an vuah, ICD hi battery hmang khawl (device) niin awmah an vuah a, lungphu mumal lo hre thei leh titawp thei a ni a. Lungphu mumal lo a awmin a tul chuan electric shock a ti thei nghal a ni.

Manchester United defender hlui, Daley Blind pawh kha lung lamah harsatna neiin kum 2019-a Champions League khelh laia a mit a vai hnuah ICD a hmang.

Kum 2021-a Euro 2020 khelh laia khelmuala tlu, Denmark forward Christian Eriksen pawh ICD vuahsak a ni tawh bawk.