ZALEN April 13, 2026 MPCC Vigilance Cell chuan vawiinah khan Aizawl Press Club-ah thu thar lakhawmtute an kawm a. Mizoram sawrkarin buhfai supply tura tender chhang hniam zawk thlang loa a chhang sang zawk LZ Juice te a thlan danah thil fel tawk lo tam tak a awm ngei nia hriain an chhui a, rihlelh ang ngeiin LZ Juice hian Mizoram mipuite buhfai ei tur an supply danah thil fel lo tam tak an hmu chhuak tih an puang.

ZPM hian an sawrkar tirh phat atanga Mizoram mipuite ei tur buhfai Mizoram sawrkarin a supply tir danah titi a tam nghal hle niin an sawi a. Food, Civil Supplies & Consumer Affairs Department chuan buhfai supply tur a thlan danah thil fel tawk lo awmin, buhfai Grade ‘A’ supply tura tender chhang hniam ber RL Store, Kulikawn, Aizawl chu thlang loin, a aia quintal khat Rs. 149 zela chhang to zawk LZ Juice chu Grade ‘A’ buhfai supply tura thlan a ni an ti.

LZ Juice in buhfai a supply tur zat chungchang RTI hmanga mi pahnihin zawhna an zawh pawh chhanna inang lo pek niin, LZ Juice in kum 2024-2025 chhungin buhfai quintal 1,80,000 supply anga chhanna pek a ni a, zawhna zawttu dang hnenah erawh quintal 2,00,000 supply tir angin chhanna pek a ni thung a, a dik zawk tihchian an phut a ni. 

FCS & CA Department-a RTI Act hmanga an dil chhanna an dawnah LZ Juice hian Grade ‘A’ buhfai supply tura tender chhang siin Grade ‘A’ buhfai supply loin Common Rice (C-Rice) buhfai zawk an supply ngei tih finfiah a ni an ti a. LZ Juice ten an buhfai supply tur an leina Suhanna Enterprise, Assam hnen atangin Grade ‘A’ buhfai ni loin buhfai man tlawm Common Rice (C-Rice) ngei an lei thu finfiah a ni an ti bawk a. Mizoram sawrkarin buhfai Grade ‘A’ a nih leh nih loh thu finfiahna nei loin C-Rice chu Grade ‘A’ angin an supply ta mai a, hei hi mipuite zah lohna lian tak a ni an ti.

LZ Juice ten Common Rice buhfai an supply dan kalphungah hian thil mak tak tak a tam hle niin an sawi a. Mizoram pawn lam atanga buhfai an phurh luh danah Mizoram chanchina thil thleng ngai lo thil mak tak tak a awm nual mai a. LZ Juice ten phai lam atanga Muanna Godown, Zuangtuia buhfai an phurh luh dan mak thenkhat an tarlan zingah JCB-in Zuangtui Muanna Godown-ah buhfai bag 720 a phur thleng a, Mahindra Pick Up-in 147 hmangin Zuangtui Muanna Godown-ah buhfai bag 157 a phur thleng a, autorickshaw-in Zuangtui Muanna Godown-ah buhfai bag 500 a phurh thlen laiin truck ke 6 nei chi niin Zuangtui Muanna Godown-ah buhfai bag 2 chauh a phur thleng thung.

Heng buhfai leh a phurtu motor intuha lo tak tak hi tum 36 zet a awm tih sawiin, Press mite hnenah hian document te nen an sem a. Heng an tarlan bakah hian challan-a motor number inziak, chhui zui ngial pawha motor registration record awm lo buhfai phur motor tam tak hmuhchhuah a ni an ti bawk.

ZPM sawrkar hnuaia Supply Minister in duhsak taka buhfai a supply tir LZ Juice ten phai lam atanga Zuangtui Muanna Godown a Zoram mipuite ei tur buhfai an phurh luh danah thil mak leh fel lo tam tak a awm ngei a ni tih a nemnghet a ni an ti.

LZ Juice in Zuangtui Muanna Godown-a buhfai an phurh luhna challan a buhfai phurtu motor number te hi ziah sual palh leh ngaih hai palh awm thei a nih avangin chutiang chu a thleng reng em tih Zuangtui Muanna Godown thuneitute chu March ni 11, 2026 ah khan MPCC Vigilance Cell ten an zawt fiah a. Godown-a buhfai phur luttu lirthei reng reng te chu uluk taka en fiah leh buk nawn vek a nih thin thu leh thil dik lo hrang hrang awm thei te uluk taka enfiah a nih thin thu an lo sawi a ni an ti.

March ni 21, 2026 a Zemabawk West Local Council inthlan campaign laia Supply Minister-in a thusawi chanchinbua lo chhuakah ‘LZ Juice ten buhfai an supply na motor number chu ziah sual palh a ni’ tia a sawi chu MPCC Vigilance Cell chuan mak a ti hle a. Heng motor number te hi ziah sual palh ni loin, LZ Juice ten buhfai an supply zat tur ziah mil nana dawhkan atanga phuailuai taka challan phuahchawp an siam avanga an motor number tarlan leh a lirthei dik tak dinhmun inang ta lo niin MPCC Vigilance Cell chuan a ngai an ti bawk.