Aizawl May 24, 2024 : Vawiin khan Congress Party chuan Congress Bhavan Golden Hall-ah Political Session hun hmangin MPCC General Secretary PC Laltlansanga chuan lehkhathiam Master degree nei ten an phu tawk hnathawh tur an hmu lo niin a sawi.

PC Laltlansanga chuan Education reforms chungchang sawiin, "Tunhnaiah Matric leh pawl 12 result a chhuak a, Mizoram pumpuiah kan result a tha thawkhat. Hetih hian kan Education hian thiamna tak tak min pe em tih kan ngaihtuah a ngai a. M.A, M.Sc kan tihte leh mithiam tam tak nia kan ngaihte hian an degree phu tawk hna thawh tur an hmu lo."

"Mizo thalaite an huaisen em em a, passport mumal lo chung pawhin Islam kulmuk takte ramah hnathawk turin an kal ngam. Mizorama political party tinte hian kan thalaiten hnathawh tur an hmuh theihna tura policy kan duan a hun tawh a. Education pawh siam tha a, chhawr tlak leh hnathawk tak tak thei tur thiamna pe tura Education hi kan siam that a ngai a ni," a ti.

ZPM sawrkar chungchang sawiin MPCC General Secretary chuan, 'Mizo thalai eizawnna mumal neilo harsatna tawk thahnem tak kan awm mek a. Chung mite hip nan chuan ZPM hotute khan, ZPM a sawrkar chuan Zoram Development Bank a din ang a, Loan a pung awm lovin thalaite bul tanna tur an pe ang a. Sawrkar hi guarantor ah atang ang, tiin an inzuar a nih kha. Khang an intiamna avang khan ZPM sawrkar hi thalaiten beiseina sang tak nen kan thlir a. An intiam angin engtikah nge Zoram Development Bank an din ang a, a pung awmlo a loan an pek hun tur Mizo thalaiten kan zawt a ni," a ti bawk.