Tun hnai khan Uvalde, Texas, USA-a school pakhatah inkahna rapthlak tak a thleng a, he thil thleng hian dem a hlawh hle. American siger Madonna chuan,"Silai hmanga tharum thawhna lakah naupang te leh midang te him taka awm turin kan ngen a ngai hi a lungchhiatthlak tak zet a ni," tiin gun law siam that a tul thu a auchhuahpui. 

Hemi chungchang hi Instagram-ah tarlangin silai khuahkhirhna dan khauh zawka siam a phut thu a sawi chhuak a, vanduaina tawkte a tawrhpui thu a sawi chhuak bawk. Kum 63 mi Madonna chuan, "Heng naupang mi 19 nu leh pate rilru nat dan tur hi ka suangtuahpui ngam lo. Elementary school kal lai ka nei a, school atanga in an lo haw thleng lo a nih chuan ka dam chhuak theiin ka inring lo," tiin naupang nu leh pate tawrhna nat tur zia a sawi. 

School-a inkahna hi May 24, 2022 (Thawhlehni) a thleng kha niin, elementary school naupang 19 leh zirtirtu mi pahnihin nunna an chan a ni. He thil thleng avang hian mi tam tak chuan US-a gun law chu an sawi sel a, khauh zawka silai khuah khirh an duh thu an au chhuahpui nasa hle. Madonna pawh hian an ram roreltute chu naupangte himna ngaipawimawh tur leh khuah khirhna dan khauh zawka siam turin a ngen a ni.