ZALEN September 1, 2025 : Thla thum zet chama USA-a zin Zoram Thar Zofate Lairelna Inpui hruaitu Rev. Zaichhawna Hlondo leh Lalruatfeli Hlondo te chuan an zinna lamah an beisei phak bakin an hlawhtling niin vawiina Aizawl Press Club-a chanchinthar lakhawmtute hmaah an sawi.

Zoram Thar Zofate Lairelna Inpui te hian Thenzawl hmuna Zofa zawng zawngte huapzo tur Biak In sak mekah an sak chhan te leh sak a tul chhan chungchang te thehdarhin USA state hrang hrang an tlawh a, state 18-a Biak In 28-ah rawngbawlna an zuk nei a ni. 

Kohhran 25 leh mimal engemaw zat hnen atangin Biak In sakna tur tanpuina hi an dawn thu an sawi a, Biak In ban man tum pawh engemaw zat an awm an ti.

USA an cham chhung hian Chin National Front hmunpui leh Chin Baptist Church, USA hmunpui an tlawh naah pawh lawm an lo hlaw hle an ti a, an hruaitute pawh thahnem tak an lo awm zel niin an sawi a, Zofate insuihkhawmna atana hmalakna chu an thupui ken ber a nih thu leh hei hi Kohhran leh pawl hruaitute hnenah pawh an sawi tam ber a ni an ti.

Zoram Thar Zofate Lairelna Inpui hian nakum hian USA-ah Mizote tan khawmpui lian buatsaih an tum a, Indianapolis-ah neih tur niin September 18-20, 2026 a neih turin ruahmanna siam a nih thu an sawi bawk.