Inkhel mang lo mah se England coach Gareth Southgate-a’n Harry Maguire leh Kalvin Phillips chu ram tana khel turin a thlang a, mak a tih a hlawh rualin fans zingah sawiseltu an tam hle a, a thlangtu thlenga demtu an tam.

Maguire hian tun season-ah Premier League-ah minute 672 chiah a la khel a, Phillips phei chu minute 201 chiah a la inkhel. 

Maguire hi Manchester United captain a ni a, inkhel vawi sarihah bul a tan phak zawk a. Manchester City midfielder phei hi chu kar hmasaa Chelsea an hneh tum bakah kha chuan bul tan pawh a la nei lo.

Heti tak hian inkhel tlem mah se England boss chuan thla thara Euro 2024 khel tur zawnnaa Malta leh Macedonia an hmachhawn turah a telh ve ve thung.

Twitter-ah fans an âng nasa nghal a, pakhat chuan, “An khelhna club-a khel miah lo chunga Phillips leh Maguire-a koh hi Southgate-a thil a ni,” a ti.

Mi dangin, “England squad-a thil lian ber chu Southgate-a hian thuin, ‘Sterling-a chu a khel tha lo va, a chawlh a ngai,’ tia a sawi rualin a dawta Maguire-a telh a ni leh si lai hi a ni,” a ti.

Mi pakhat phei chuan AC Milan defender Fikayo Tomori aia Maguire thlan a ni chu mak a ti hle a ni ang, “Thla tam tak inkhel lo chungin Tomori aiin Harry Maguire chu a tha zawk tho,” tiin el takin a tar lang.

Maguire-a a tel mak titu dang pakhat chuan, “A club tana khel ngai lo Maguire aia Tomori a that loh zawkna hi min hrilh teh u,” a ti bawng bawng mai.

Inkhel lova Southgate-a team-a Phillips a tel zel chungchangah mi pakhat chuan, “Kalvin Phillips angah hian inchan ta ila, infiamna khawvelah a hna hi a awlsam ber âwm e,” a ti.

Khawvela defender man to ber, Maguire-a hi captain ni mah Lisandro Martinez, Raphael Varane leh Victor Lindelof a el pha lo va, left-back Luke Shaw pawh a dinnaah an dintir zeuh zeuh bawk avangin Erik ten Hag-a team tan a inlan phak meuh lo.

Hetianga a player thlan dan sawisel a nih mek lai hian Southgate-a tawng chhuak a, Maguire bik chu a dinhmun a derthawng tih a sawi ve ta hial a. “Hetiang reng hi chu a ni bik lo vang,” tiin club-a a inlan tam loh chuan England-a a hmun chu a luah reng theih dawn loh thu a sawi.

Phillips chu England tana khel thei turin a awmnaa awm player dang an ngah lo niin coach hian a sawi bawk.

Phillips hi City-ah a aia thlan zawk tur an tam a, Southgate-a team-ah erawh a lailum a la chang pha tlat si a ni.