Aizawl: Union Minister of Culture, Environment, Forest & Climate Change, Dr. Mahesh Sharma chuan sorkar laipuiin Mizoram chu cultural centre a nih theih nana hma la turin a hnenah a hrilh niin a sawi. He thu hi nimina Superintending Archaeologist, ASI Office Tuikhuahtlanga Archaeological Survey of India (ASI), Aizawl Circle a hawnnaah sawiin Mizoram state tan hmathlir thui tak sorkarin a neih thu a sawi bawk. “India ram chu kum 2020-ah kum 75 a ni tawh dawn a, he hun a thlen meuh hi chuan India thar, zalenna sualtuten an lo mitthla thin India kan nei thei a ni,” a ti a. He hunah hian India thar retheihna bona hmun, firfiakna a che thin mi sualte awm lohna hmun leh thil tha tam tak awmna hmunah siam theih niin a sawi a, hei hi PM Narendra Modi hmathlir niin a sawi a ni. He hun hmanpuitu Mizoram Governor, Lt. Gen. Nirbhay Sharma pawhin thu sawiin ASI Aizawl Circle thar chu Mizo te culture-a thil hlui tha tak tak hmuh chhuah nan a tangkai dawn hle tih a sawi a. Hmanni lawkah hmun hlui pakhat Vangchhia chu hmuh chhuah a ni tih sawiin hei hian chona leh phurna a siam thu leh hei lo pawh hi hmun dang tam tak hmuh chhuah tur a la awm ngei a rin thu a sawi bawk. Archaeological Survey of India, Aizawl Circle hian Mizoram, Manipur leh Tripura te a vil dawn a ni.