Mahindra Pickup 4x4 LPS Pro Muaythai-a tel turte entry form an la chhuak tan a. He mi rothap te inelna turah hian lawmman pawisa fai cheng 3,60,000 ruahman a ni.

October 7-ah R Dengthuam Indoor Stadium, Mualpuiah khelh tan tur a ni a, kum 15 atanga 45 inkar a duh apiang tan September 12 atangin LPS Office, Zarkawtah entry form lak theih a ni a, a October 1 thlengin theh luhna hun hawn a ni.

Muaythai Association of Mizoram hruaitute chuan Olympic Games-ah Muaythai lak luh a nih tawh avangin Mizote tan beiseina sang tak an nei a, Mahindra Pickup 4x4 LPS Pro Muaythai atangin hmasawnna a awm ngei dawn tih sawiin tel turin thalaite an sawm nghal bawk.

Muaythai khelhna pangngai ring-ah ni lovin mixed martial arts hmanga an inbeihna cage chhungah an innuai dawn a, Muaythai amatuer dan hnuaia inelna sang ber hmangin an inkhel ang. Mipui tana hmuhnawm tur ringawt ni lovin muaythai hnuaia an kalpui mek amatuer leh professional tihhmasawn kawp an duh a, chumi mil tur chuan dan an siam a ni.

Weight hrang panga, kg 48 chin hnuai lam fly, kg 48 leh 54 inkar bantam, kg 54 atanga 63.5 inkar light, kg 63.5 atanga kg 71 inkar welter leh kg 75 chin chung lam super middle huangah title an inchuh dawn.

Weight tina champion hnenah Rs 3,00,000 zel pek an ni ang a, pahnihna Rs 1,50,000, semifinal-a tlaten Rs 7,500, quarterfinal-a tlaten Rs 3,000 zel an dawng dawn. Mahse, weight khatah tel 16 aia an tlem a nih chuan semifinal lut chin chauhin lawmman pawisa fai an la thei dawn a ni.