Mahindra Pikup 4x4 LPS Pro Muaythai 2022 khan quarter-final khelh tan niin bout 6 a awm a, round a sang chhoi tulh tulh a, insual pawh a hmuhnawm chho tawh hle a ni.

Mahindra Pikup 4x4 LPS Pro Muaythai quarterfinal khelh ṭan a ni a, kuttum leh ke hmanga innuaina nasa leh hmuhnawm fighter-ten an lantir.

Asian silver medal latu Hunthar fighter Joseph Vanlalhruaia'n rei lo te chhungin Reuben Lalrinmawia (Bethlehem Vengthlang) a hneh a. Flyweight semifinal-ah Zomuanpuia (Tuithiang) hnehtu Zemabawk tlangval R Lalbiaktluanga nen an intawng ang.

Indian kickboxing champion Nazareth Lalṭhazuala'n lightweight semifinal a lut a, round thum khel zo lovin amah aia kum 10-a upa David Zairemthanga (ITI Veng) a nuai tlawm. Kum 20 mi, Zemabawk tlangval hian D3 Haier Fighter of the Night lawmman Rs 1,500 a dawng a ni.

Weight hrang panga zinga pathum - fly, bantam leh light quarterfinal-a tlaten lawmman Rs 3,000 zel an dawng a. Organising Committee-in a lo rel lawk tawh angin quarterfinal aṭanga lawmman pawisa fai la thei turin weight khatah mi 16 tal an tel a ngai a, chu bakah lawmman pawisa dawng turin mi pakhat tal hneh a ngai bawk.

Welterweight-a mi 16 tel an tlin loh avangin semifinal lut chinin lawmman pawisa fai an dawng dawn a; super middle open huangah tel pali chiah an awm avangin final lut mi pahnih chauhin lawmman pawisa fai an la thei dawn a ni.

RESULT

FLYWEIGHT

Joseph Vanlalhruaia (Hunthar) bt Reuben Lalrinmawia (Bethlehem Vengthlang)
= Technical Knockout (Round 1, 1:45 min)

R Lalbiaktluanga (Zemabawk) bt Zomuanpuia (Tuithiang)
= Unanimous Decision (29-26, 28-27, 29-26)

BANTAMWEIGHT

Eric Biakthianghlima (Thuampui) bt VL Sangzela (Chhingchhip)
= Unanimous Decision (30-27, 29-28, 30-27)

Lalruatkima (Falkland) bt S Malsawmdawnga (Thuampui)
= Technical Knockout (Round 2)

LIGHTWEIGHT

Nazareth Lalthazuala (Zemabawk) bt David Zairemthanga (ITI Veng)
= Technical Knockout (Round 3, 2:48 min)

WELTERWEIGHT

Isaac Lalchhuanmawia (Chanmari) bt RC Rohlupuia (Dinthar)
= Unanimous Decision (29-27, 29-27, 29-26)

D3 Haier Fighter of the Night
- Nazareth Lalṭhazuala (Zemabawk)